اسلام آباد۔ 10 جون (اے پی پی) اسپیکر قومی اسمبلی و چیئرمین سینیٹ پیٹرول آ مروک آ خڑچ آتیا 40 درسد کٹوتی نا فیصلہ کرینے۔ جمعہ نادے آ اسپیکر قومی اسمبلی راجہ پرویز اشرف و چیئرمین سینیٹ محمد صادق سنجرانی اوڑدہی کریر۔ اوڑدہی ٹی بجٹ و پارلیمان نا ہڑتوم آ ایوان تا برجادیوان و کانود جوڑ کننگ نا بابت گپ وتران کننگا۔ اسپیکر راجہ پرویز اشرف پارے کہ ملک زرگزرانی مشکل آتا گواچی ءِ، سیاسی سرکڑدہ غاتے اواری اٹ دا تنکی آن کشنگ کن لائحہ عمل اس مرتب کننگ وخت انا اہم ءُ گرج اسے، الس نا نمائندہ غاک اُن، اوفتا تکلیف ءِ محسوس کینہ اوفتے تون سلوک اُن۔ اوفک پاریر کہ مشکل حالیت آتیٹی کفایت شعاری ءِ تینا کننگ المی ءِ۔ پیٹرول نا مد اٹی 40 درسد کٹوتی نا اطلاق اسپیکر و ڈپٹی اسپیکر، چیئرمین و ڈپٹی چیئرمین سینیٹ، و ایلو بڑزکو عہدیدار آتیا مریک۔ دا کٹوتی نا اطلاق ہڑتوم آ ایوان تا قائمہ کمیٹی تا چیئرمین و غٹ آفیسر آتیا لاگو مریک۔
