اسلام آباد۔ 09 جون (اے پی پی) بنجائی حکومت پوسکن آ مالی سال 2022-23کن بنجائی میزانیہ(بجٹ) اینو جمعہ نادے آ پارلیمنٹ اٹ پیش کیک ہراٹی مون تروک ملکی و جہانی منظر نامہ نا رداٹ مالی وزری سوگوی، نسخان اٹی کمتی، برآمد آتیٹی ودکی و درآمد آتا متبادل ہندی مصنوعات آتا تیاری، کاروبار و زرکاری ٹی آسانی و کشت وکشار نا مون آ دننگ آ چکار تخنگانے۔ بنجائی وزیر خزانہ ومحصولات ڈاکٹر مفتاح اسماعیل قومی اسمبلی ٹی بجٹ ءِ پیش کیک۔ حوالی نا رداٹ پوسکن آ مالی سال انا پی ایس ڈی پی ٹی بلوچستان و ورناتیکن چندی اسکیم تا بناءِ کننگ انگ ءِ، ہائیر ایجوکیشن کمیشن نا ڈٹ آتیان بیدس وزیراعظم میرٹ بیسڈ لیپ ٹاپ اسکیم نا رداٹ ہُشار طالب علم آتے لیپ ٹاپ فراوان کننگک۔ داکان بیدس اسہ پین اسکیم اس ہم درستی راستی کرفنگ انگ ءِ ہرانا رداٹ بڑزکو تعلیمی ادارہ غاتا طالب علم آسان قسط آتیا لیپ ٹاپ ہلنگ کیرہ، صوبہ غاتا کمک اٹ کسبی تربیت نا 250 انسٹیٹیوٹ جوڑ کننگک۔ داکان بیدس صوبہ غاتا شریداری اٹ 250 منی سپورٹس اسٹیڈیم ہم تفنگک، چین۔ پاکستان اقتصادی راہداری نا رداٹ چندی ڈٹ آتے فاسٹ ٹریک بنداو تیا پورو کننگ کن وسیلہ و فنڈ جتا کننگ ءِ پک کننگک، ہندا وڑ متکن آ گوادر شاراٹی بجلی و دیر انا ویل آتا ایسری کن فنڈ جتا کننگک۔ بلوچستان شونداری بجٹ نا اہم ہدف ءِ ، بلوچستان ءِ ایلو صوبہ غاتا مقابلہ ٹی زیات شونداری فنڈ تننگ انگ ءِ تانکہ ہموڑے برجا ڈٹ آتے پورو کننگ مرے و پوسکن ءُ ڈٹ ہم بناکے۔ مسکوہی فاٹا نا اوار مروک ضلع غاتیٹی شونداری ڈٹ آتیکن 50 ارب روپئی نا فنڈز جتا کننگ نا سلاہ ءِ۔ حوالی نا رداٹ بنجائی وزیر خزانہ و ایلو تعلقدار وزارت و ڈویژن تا کنڈآن پوسکن آ مالی سال انا بنجائی بجٹ کن تیاریک پورو ءُ و اودے گڈیکو دروشم اس تننگ انگ ءِ۔ پوسکن آ مالی سال انا بنجائی بجٹ ءِ کوویڈ۔ 19 نا جہانی دین و روس یوکرین جھیڑہ نا سوب آن مچ آ دنیا ٹی ودی مروک آ زرگزرانی مشکل و ویل و ملکی کہول آ مون تروک مالیاتی چیلنج آتے مون آ تخسا ترتیب تننگ نا کوشست کننگانے۔ بجٹ اٹ الس نا مشکل آتے کم کننگ، کشاری بشخ انا شونداری و دا بشخ ءِ پوسکن آوڑتتون ہم گرنچ کننگ، انفارمیشن ٹیکنالوجی و دا بشخ انا برآمد آتیٹی ودکی، صنعتی شونداری و کاروبار زرکاری کن گچین و سازگار چاگڑد نا فراوانی ءِ خاص اہمیت تننگانے۔ مالیاتی انتظام و انصرام ءِ سوگو کرسا بجٹ اٹ اقتصادی سوگوی و نمو، غیر شونداری خڑچ آتیٹی کمتی ، ملازمت آتا وارخواہی تیٹی ودکی، الس دوست پالیسی و ملک انا راجی و اقتصادی شونداری آ چکار کننگانے۔ پوسکن آ بجٹ اٹ راجی بشخ انا شونداری، چندی بشخ آتیٹی اصلاحات نا پروگرام تے مون آ دننگ و گورننس و نجی زرکاری نا است بڈی ءِ کننگک، داکان بیدس حکومت کٹیا تا بنداو اٹ ودکی، خراج نا بشخ اٹی اصلاحات و خراج تروک آتیکن آسراتی نا فراوانی ٹی ودکی آ ہم تینا چکار ءِ تخک و دابابت گام گیج درستی راستی کرفنگک، وزیراعظم شہباز شریف نا وژن ءِ مون آ تخسا شونداری نا بنداوی گرج کون آ دیر انا وسیلہ غاتے شون تننگ ءِ پی ایس ڈی پی ٹی اولیت تننگانے، بڑزکو تعلیم نا بشخ ہم پی ایس ڈی پی نا اولیتی بشخ ءِ، دانا رداٹ ورناتیکن فنڈ و وظیفہ غاتیٹی ودکی کننگک، فزیکل انفراسٹرکچر کون آ روڈ، شاہراہ و بندرگاہ تا تفنگ ننا مسٹ میکو اہم اولیت ءِ، دا بشخ آتیٹی اہم و کلیدی زرکاری ءِ پک کننگک۔
