اسلام آباد۔ 09 جون (اے پی پی) بنجائی وزیر زرکاری چوہدری سالک حسین پارینے کہ مسکوہی حکومت نا دور اٹی سی پیک کن مالی وسیلہ جتا کننگ و عملدرآمد نا بانات آتے اولیت تننگتو، غیر زموارانہ بیان تیان چینی کمپنی تا پت مجروح مسنے، گوادر پورٹ اٹ ڈریجنگ نا زمواری ءِ ہم پورو کننگتو۔ پنچ شنبے نادے آ بڑزکو ایوان نا دیوان اٹی وقفہ سوج آتیٹی سینیٹر بہرہ مند تنگی، سینیٹر محسن عزیز نا سوج آتا ورندی ٹی اوپارے کہ 2018-19نا مسکوہی حکومت نازمواری تا کنڈآن غیر زموارانہ بیان تیان چینی کمپنی تا پت ءِ ٹھیس رسینگا، گوادر اٹ ڈریجنگ نا زمواری ننا ئسک ولے چار سال اٹی اوڑآ ہچ اس کننگتو ، ہرانا سوب آن داسہ بھلو جہاز اس پورٹ انا خڑک لنگرانداز مننگ کپک، ساڑی حکومت داسہ داڑآ کاریم کننگ ءِ و زوت ڈریجنگ بناکیک۔ اوپارے کہ 2020ء آن 2005 اٹی بنداوی پنجر نا تفنگ تون اوار اوار صنعتی سرجزآتا مون آ دننگ کن ارٹ میکو ریسہ ءِ بنامروئی ئسک اوڑآہم پیش رفت متو، گڑاس ءِ خوش کننگ کن اکنامک زون تا پڑو تو کننگا ولے عملی وڑاٹ ہموڑے ہچ ءُ صنعت اس لگنگ کتو، داسہ دا ویل ہم ایسر مریک۔ اوپارے کہ ہندی زرکارآتا زرکاری کن است بڈی ءِ کننگک، وسیلہ غاتا کمتی نا سوب آن ترند رفتار شونداری کن گڑاس فیصلہ کننگا تانکہ بنداوی پنجر ءِ شون تننگ مرے، براہ راست زرکاری اگہ بسنے تو ننے اونا رکھ ءِ کروئی ءِ، سی پیک نا وت گوادر ءِ، چین قراقرم ہائی وے ٹی زرکاری کن تیار ءِ، اِرابھلو ڈیم جوڑ مننگ نا سوب آن ننے داکنڈآ چکار کروئی مریک۔ سلابت اٹ باندات آتے مون آ دننگے، وزیراعظم میثاق زرگزران نا سلاہ تسنے، سیاست مرساکاہک، نن ملکی باندات آتے اولیت ایتن۔ اوپارے کہ نن اسہ پورٹل اس جوڑ کننگ اُن تانکہ کاروبار اٹ آسانی ودی کننگ مرے، داٹی ایس ای سی پی و ایلو غٹ ادارہ غاتے اوار ہلسا کانہ ، دا چرجوئی ٹی صوبہ غاتون ہم اسہ ایلو ءِ معلومداری تننگک۔
