اسلام آباد۔ 09 جون (اے پی پی) وزیراعظم نا سلاہکار امور کشمیر و گلگت بلتستان قمر زمان کائرہ تون گلگت بلتستان کونسل باسک آک پنچ شنبے نادے آ داڑے اوڑدہی کریر و جی بی کونسل نا زمواری ، گلگت بلتستان اٹی شونداری عمل و الس نا ویل آتا بابت سرجمی اٹ گپ وتران کننگا ۔ سلاہکار امور کشمیر و گلگت بلتستان کونسل باسک آتے پارے کہ بنجائی حکومت گلگت بلتستان نا شونداری و شونہالی کن ہرممکن کمکاری ءِ برجاتخک۔ کونسل نا باسک آک پاریر کہ گلگت بلتستان کونسل نا غیر فعال مننگ آن الس نا اومیت آتیا پورو سلنگ آن قاصر ءِ، عبوری صوبہ نا جوڑ کننگ گلگت بلتستان نا الس نا متکن آ خواست ءِ، صوبہ نا جوڑ کننگ نا فیصلہ اسکان جی بی کونسل نا واکداری تے پیدوار کننگے۔ قمر زمان کائرہ پارے کہ گلگت بلتستان کونسل نا بےیقینی نا کیفیت ءِ چٹفنگ کن زوت لائحہ عمل اس شین تننگک، صوبائی حکومت و ایلو اسٹیک ہولڈر آتا تین پہ تینی سلابت آن حکمت عملی اس ترتیب ایتنہ۔ اونا پاننگ ئس کہ 2009 ٹی ہم گلگت بلتستان نا الس ءِ واکداری ننا حکومت تسوسس، آخبت ہم داجاگہ نا الس ءِ واکداری تننگ کن ہروڑنا کمک کینہ۔ قمر زمان کائرہ پارے کہ بنجائی حکومت و صوبائی حکومت نا نیام اٹ ورکنگ ریلیشن شپ ءِ پین گچین کننگک، غٹ تر سیاسی تعلقداری تیان ایڑتر مرسا تینا زمواری تے سرایتیوہ۔ اونا پاننگ ئس کہ وزارت امور کشمیر و گلگت بلتستان علاقہ نا الس نا ویل آتا ایسری کن ہرممکن کمکاری ءِ برجاتخک۔ اوڑدہی ٹی گلگت بلتستان اٹی برجاہائیڈل ڈٹ و سکردو بالی پٹ ءِ انٹرنیشنل جوڑ کننگ نا بابت ہم گپ وتران کننگا۔
