اسلام آباد۔ 09 جون (ا ے پی پی) سینیٹ اٹی قائد ایوان و وزیر کانود سینیٹر اعظم نذیر تارڑ پارینے کہ جج صاحب آتا تقرری کن پارلیمانی کمیٹی تینا کاریم ءِ کننگ ءِ، فوجداری و دیوانی نظام انصاف ءِ گچین کننگ نا بھلو گنجائشت اس ارے۔ پنچ شنبےنادے آ بڑزکو ایوان نا دیوان اٹی وقفہ سوج آتیٹی سینیٹر مشتاق احمد و سینیٹر اعجاز چوہدری نا سوج آتا ورندی ٹی اوپارے کہ نظام انصاف اٹ خامی تیان مچ آ راج اٹی خرابی ودی مریک، ہژدہ می و نوزدہ می ترمیم اٹی بدبختی اٹ ہمونتیجہ غاتے دوئی کننگ متو ہرافتے دوئی مروئی ئسک، مچ آ پارلیمان دا سجفے کہ ہراتم اسکان آئین اٹ ترمیم و کانود سازی کپنہ ہمووخت اسکان غاو مرسا کیک۔ عدلیہ ٹی شفاف وڑاٹ میرٹ آ تقرری نظام انصاف اٹ گچینی کن بھاز اہمیت تخک۔ عدلیہ ءِ اسہ حداسکان سلاہ تننگ مریک، مقدمہ غاک زیر التواضرور اریر، فوجداری و دیوانی نظام انصاف ءِ گچین کننگ نا بھلو گنجائشت اس ارے ہراتم اسکان سول جج و مجسٹریٹ سہی فیصلہ کپسہ مقدمہ غاتیٹی التواء برساکیک، پارلیمنٹ نا باسک آک کانودی اصلاحات اٹ بایدے کمک کیر۔ اوپارے کہ جج صاحب آتا تقرری کن پارلیمانی کمیٹی تینا کاریم ءِ کننگ ءِ، داسہ دا خواست کننگ انگ ءِ کہ جج آتا تقرری ہراحداسکان ممکن مرے ، شفاف وڑاٹ امنائی سلاہ اٹ بایدے مرے۔ داچرجوئی ٹی حکومت تینا زمواری تے پورو کیک۔ اوپارے کہ جھت بندی نا دوبہ بیرہ وکیل آتے تننگ مفک، ملک اٹی اسہ لکھ 73 ہزار وکیل ءُ، ہزار اِر اہزار بندغ نا سوب آن مچ آ وکلابرادری ءِ دوبہ دار تننگ مفک، نن کانود نا تعلیم نا ڈائریکٹوریٹ اس جوڑ کرینن ہرا داکان مہالو الوکہ۔
