سینیٹ مالی زمواری و قرض حد(ترمیمی) بل 2022ء نا منظوری ءِ تس

اسلام آباد۔ 09 جون (اے پی پی) سینیٹ مالی زمواری و قرض حد (ترمیمی) بل 2022ء نا منظوری ءِ تس۔ پنچ شنبے نادے آ بڑزکو ایوان نا دیوان اٹی وزیر مملکت خزانہ ڈاکٹر عائشہ غوث پاشا تحریک پیش کرے کہ مالی زمواری و قرض حد(ترمیمی) بل 2022ء ءِ قومی اسمبلی نا منظور کروک حالیت اٹ زیر غور اتنگے۔ قائد حزب اختلاف سینیٹر ڈاکٹر وسیم شہزاد پارے کہ دا بل ءِ قائمہ کمیٹی آ بایدے گدریفنگے تانکہ داڑآ سرجمی اٹ سجفنگ مرے۔ سینیٹر شوکت ترین و ایلو باسک آک ہم قائمہ کمیٹی ٹی گدریفنگ نا خواست کریر۔ چیئرمین پارے کہ قائمہ کمیٹی ساڑی اف، اینو دانا تشکیل مریک۔ قائد ایوان اعظم نذیر تارڑ پارے کہ دا بل ءِ تحریک انصاف نا حکومت تیار کریسس، نن داٹی ہچ ءُ بدلی اس کتنون۔ وزیر مملکت ڈاکٹر عائشہ غوث پاشا پارے کہ دابل اسہ سال آن پدسلوک ءِ و نن وام تا باندات اٹی مالیاتی نظم و ضبط اتنگ خوانہ، دادے منظور کننگے انتئے کہ دا ننا ملکی ساکھ انا باندات ءِ انتئے کہ ننے پاننگک کہ نم قول کیرے ولے پورو کپیرے۔ تحریک پیش مننگ تون اپوزیشن باسک آک نعرہ خلنگ نا بناءِ کریر و چیئرمین ڈائس نا مون آ مچ مسر۔ اوکان پد ایوان تحریک نا منظوری ءِ تس اوکان پد بل ءِ شق وار منظوری کن ایوان اٹ پیش کننگا ہرادے منظور کننگا۔