اسلام آباد۔8جون (اے پی پی): مزن وزیر محمد شہباز شریف ءَ گوشت کہ پاکستان ءِ اقتصادی سلامتی سیاسی برجائی ءَ گوں بندوک اِنت، وھد ءِ لوٹ ھمیش انت کہ سیاسی ھاٹیگ ءُ توامیں سیادی داروکیں پریک وتی کساسن کسانیں سیت آں چہ برز تر بوھان ءَ معیشت ءِ بابت ءَ تپاک بکن اَنت، وام آنی ڈکال ءَ چہ گر ءُ چیل بوھگ ءِ واستہ برآمدات آناں ودینگ ءُ درآمد آناں کم کنگ ءِ ضلورت انت، ھمبراھ داریں حکومت ءَ معیشت ءِ برجائی ءِ واستہ سکیں پیسلہ کتگ۔ اے ھیالانی درشانی آئی ءَ مزن وزیر ءَ را چار شمبے ءِ روچ ءَ وتی جتا جتائیں ٹویٹس آنی تہ ءَ کت۔ مزن وزیر ءَ ٹویٹ ءَ پری بجٹ کانفرنس ءَ گوں وتی گشتانک ءِ یک یک ٹک آناں سہرا کتگ۔ مزن وزیر ءَ گوشت کہ معیشت ءِ چیردستیں پالیشی آنی رچ ءَ را دل یکیمی کنگ لوٹ ائیت۔ مزن وزیر ءَ گوشت کہ مئے کرا جوانیں بنی آدمی وسیلگ، جوانیں زمین ءُ میدان است بلے مئے گہتریں گامگیج ءُ مھکمیں گامگیج آنی وسیلگ ءَ پد ءُ رند ءِ ضلورت انت چیا کہ اے منصوبگ آنی پکوئی بوتگ ایشی ءِ سبب ءَ ایشی ءِ ھرچ ءُ درچ ءُ ایشرا سرجم کنگ ءِ وھد ءُ پاس ءِ تہ ءَ گیشی بوتگ۔ مارا اے مھتلی ءَ را گر ءُ دار کنگ ءِ ضلورت انت۔ آئی ءَ گوشت کہ پری بجٹ بزنس کانفرنس ءِ ٹک آنی رد ءَ، من آئی ٹی، ایکسپورٹ، کشت ءُ کشار، فنانس سیکٹر ءُ فوڈ سیکورٹی ءَ گوں دست مانجنیں مردم ءُ کلانہ آنی یک جتائیں ٹاسک فورسز ءِ جوڑ کنگ ءِ پیسلہ کتگ تانکہ گوں ترندی ءَ پکوئیءِ واستہ شور ءُ مشور آناں پکو کنگ بہ بیت۔ مزن وزیر ءَ گوشت کہ وام آنی ڈکال ءَ گوں گوں گر ءُ چیل بوھگ ءِ واستہ برآمدی چیز آنی ودینگ ءُ درآمدات آناں کم کنگ ءِ ضلورت انت۔ مزن وزیر ءَ گوشت کہ کشت ءُ کشار، تجارت، صنعت، آئی ٹی ءُ مالیاتی کلانہ آناں پری بجٹ بزنس کانفرنس ءَ برجائیں بھر زوری ءُ شور ءُ مشور ءِ واستہ ھاسیں شگر ءُ منت واری ءَ گراں، اے بزنس کانفرنس معاشی جیڈھ آنی گیش ءُ گیواری ءُ دیم ءَ جنزگ ءِ واستہ ھیال ریچی کنگ ءِ جوانیں پلیٹ فارم اِت۔
