اسلام آباد۔ 08 جون (اے پی پی) وزیراعظم شہباز شریف ملک اٹی زرکاری ءِ ودفنگ کن بھلو گام اس ہرفسا چندی بشخ آتیکن ٹاسک فورس جوڑ کننگ نا پارت کرے، دا ٹاسک فورس سیل وسوات، آئی ٹی، فارما، ای کامرس و کشت و کشار آ جوڑ کننگک۔ چارشنبے نادے آ وزیراعظم آفس میڈیا ونگ آن جاری بیان نا رداٹ وزیراعظم شہباز شریف تون امریکن بزنس کونسل نا ڈل اسلام آباد اٹی اوڑدہی کرے۔ اوڑدہی ٹی فارما، فوڈ پراسیسنگ ، آئی ٹی سیکٹر، ای کامرس، ریٹیل سیکٹر، ٹیکسٹائل، سپورٹس و لاجسٹکس نا بشخ آتا نمائندہ غاک بشخ ہلکر۔ اوڑدہی ٹی بنجائی وزیر سید نوید قمر، مخدوم مرتضیٰ محمود، مریم اورنگزیب و تعلقدار بڑزکو آفیسر آک ہم ساڑی ئسر۔ وزیراعظم شہباز شریف چندی سیکٹر آتیٹی زرکاری ءِ ودفنگ کن ٹاسک فورس جوڑ کننگ نا پارت جاری کرسا پارے کہ برآمدی صنعت آتا خام مال آ غٹ خراج ءِ چٹفنگے۔ اوپارے کہ سیل و سوات، فارما، آئی ٹی، ای کامرس، بھلو کچ اسے آ مینو فیکچرنگ و کشت وکشار آ ٹاسک فورس جوڑ کننگ انگ ءِ، حکومت پاکستان ات ایکسپورٹ کوالٹی نا کشاری اجناس نا پیدوار ءِ پک کننگ ءِ، تاریخ اٹ اولیکو وار پالیسی تا چرجوئی نا ہیت ءِ نن کرینن۔ وزیراعظم پارے کہ ملکی زرگزران و لس بندغ ناآسودہی سیاست آن ایڑتر ءِ۔ داوخت آ بشخ ہلوک آک پاریر کہ حکومت نا پالیسی تا سوب آن زرکار آتا پت بحال مسنے، بجٹ آن مست حکومت نا غٹ اسٹیک ہولڈر آتون سلابت ستاکڑزک۔ وزیراعظم بنجائی سیکرٹری کامرس و سیکرٹری زرکاری بورڈ ءِ زرکارآتا ویل آتے دمدستی ایسر کننگ نا پارت کرسا پارے کہ اسہ ہفتہ نا تہہ ٹی غٹ ویل آتا سدباب کرسا رپورٹ پیش کننگے۔
