حکومت توانائی نا تنکی و ایلو چیلنج آتون مون تننگ کن سنبرینگوک ءِ، چیئرمین سینیٹ نا جہانی بینک انا کنٹری ڈائریکٹر تون اوڑدہی ٹی گپ وتران

اسلام آباد۔ 08 جون (اے پی پی) چیئرمین سینیٹ محمد صادق سنجرانی پارینے کہ حکومت توانائی نا تنکی و ایلو چیلنج آتون مون تننگ کن سنبرینگوک ءِ، چندی بشخ آتا شونداری ٹی جہانی بینک انا کمک ستاکڑزک، اقتصادی بحالی و سوگوی کن پتی پالیسی شین ترسا گام گیج کننگ انگ ءِ۔ سینیٹ سیکرٹریٹ نا رداٹ داہیت ءِ چیئرمین سینیٹ جہانی بینک انا کنٹری ڈائریکٹر ناجے بنحسائین تون اوڑدہی ٹی گپ وتران کرسا پارے۔ اوڑدہی ٹی توانائی، تعلیم، جان جوڑی و شونداری بشخ آتیٹی برجا گام گیج آتا بابت گپ وتران کننگا۔ اوڑدہی ٹی پاکستان اٹ ورلڈ بینک انا کمک اٹ برجا ڈٹ آتیا ہم گپ وتران کننگا۔ چیئرمین سینیٹ پارے کہ حکومت توانائی نا تنکی و ایلو چیلنج آتون مون تننگ کن سنبرینگوک ءِ، چندی بشخ آتا شونداری ٹی جہانی بینک انا کمک ستاکڑزک۔ اوپارے کہ اقتصادی بحالی و سوگوی کن پبی پالیسی شین ترسا گام گیج کننگ انگ ءِ، پاکستان اٹ غٹ درملکی زرکارآتے غٹ تر آسراتی فراوان کننگ انگ ءِ۔ چیئرمین سینیٹ پارے کہ الس نا نمائندہ غاتا وڑاٹ پارلیمنٹرین آتا زمواری مریک کہ او پائیدار شونداری نا ہدف آتے دوئی کننگ کن کوشست کیر۔ اواومیت ظاہر کرے کہ ورلڈ بینک گورننس و سروس ڈیلیوری کن ادارہ جاتی اصلاحات اٹ پارلیمان و حکومت پاکستان نا مخ تفی ءِ برجاتخک۔ اوپارے کہ جہانی بینک تکنیکی و مالی امداد نا کمک اٹ ملک انا ورناآبادی نا لائخی تے کاریم اٹ اتنگ کن بھاز اہم کڑد ادا کننگ کیک، پائیدار شونداری کن اسیجائی فریم ورک اس جوڑ کننگ کن پارلیمان و ورلڈ بینک حکومت ءِ انگیج کننگ کیرہ ہراڑآن امداد نا فائدہ غاتیٹی پین ودکی مریک۔ ورلڈ بینک کنٹری نا ڈائریکٹر پارے کہ پاکستان ءِ مون تروک چیلنج آتون مون تننگ ، پائیدار شونداری و توانائی نا تنکی تون مون تننگ کن ورلڈ بینک پاکستان نا کمکاری ءِ برجاتخک۔