بنجائی وزیر حوالکاری مریم اورنگزیب پی ٹی وی فلم ڈویژن و پاک فلکس پروجیکٹ نابناءِ کرے، پروجیکٹ نا مسخت ورناتا فلم سازی ٹی مشغولیت ءِ مون آ دننگ  ءِ، بنجائی وزیر نابنائی دود آن تران

اسلام آباد۔ 08 جون (اے پی پی ) بنجائی وزیر حوالکاری و شینکاری مریم اورنگزیب پی ٹی وی فلم ڈویژن و پاک فلکس پروجیکٹ نابناءِ کرے، پی ٹی وی فلم ڈویژن نا مسخت ورناتا فلم سازی ٹی مشغولیت ءِ مون آ دننگ ءِ، پاک فلکس پروجیکٹ اٹ پی ٹی وی نا مواد ءِ آن لائن کننگک۔ پی ٹی وی فلم ڈویژن نا بنائی دود آن تران کرسابنجائی وزیر حوالکاری پارے کہ 2017ء ٹی پی ٹی وی فلم ڈویژن آ کاریم نا بناءِ کریسس، 2018 ء ٹی کابینہ نا منظوری آن پاکستان نا اولیکو فلم پالیسی نا بناءِ کرین۔ اوپارے کہ پاکستان نا جوڑ مننگ نا 70 سال پورو مننگ آ جمال شاہ پاکستان نا اولیکو کلچر پالیسی اس تیار کریسس۔ بنجائی وزیر حوالکاری پارے کہ بدبختی اٹ ملک اٹ فلم ءِ انڈسٹری نا درجہ دوئی الوکہ، 2018ء ٹی نن نئے بیرہ فلم پالیسی جوڑ کرین بلکن اولیکو وار فلم ، کلچر سیکٹر و غٹ اسٹیک ہولڈر آتے داٹی اوار کرسا اسہ جوان ءُ مسودہ و فلم انڈسٹری ءِ صنعت نا درجہ تسن۔ اوپارے کہ اولیکوفلم پالیسی ٹی فلم انڈسٹری ءِ خراج آسودہی و سینما کن انفراسٹرکچر آسودہی اوار ئسر ولے بدبختی اٹ مسکوہی دور اٹی فلم پالیسی آ اونا وڑانا رداٹ عمل مننگ کتو۔ اوپارے کہ پی ٹی وی سکرین راج اکن بیانیہ اس ٹہیفک ۔ پی ٹی وی تینا سوگو بنداو تا سوب آن اینو اسکان تینا ساکھ ءِ برجاتخانے۔ اوپارے کہ حکومت ءِ اسہ ہندن ءُ پلیٹ فارم اس مہیا کروئی ءِ ہراڑے غٹ اسٹیک ہولڈر آک یکجا مننگ کیر۔ بنجائی وزیر حوالکاری پارے کہ پی ٹی وی نا مینڈیٹ قومی بیانیہ ءِ ٹہیفنگ ءِ، پی ٹی وی ءِ دا رمب اٹ اوار مروئی اف ہراکہ اونا اف۔ مریم اورنگزیب پارے کہ دا ملک دہشت گردی تون جنگ تسنے ہرانا بھلو داستان اسے ، ننے راج ءِ دانا اثرآتیان رکھ تخوئی ءِ۔ بنجائی وزیر حوالکاری پارے کہ مریس مد ریفارم المی ءِ، مہالو ہم داوڑنا گام گیج کرین ہراڑآن معاد ءِ مون آ دننگ مرے۔ بنجائی وزیر حوالکاری پارے کہ داوخت آ ٹیکنالوجی ایڈوانس مسنے، سینما گرافی ہم گچین ءِ ولے مواد نا کمتی ءِ۔ اوپارے کہ نجی چینل، فلم ، ڈاکومینٹری ٹی چناتا مواد آتا کمتی نا سوب آن ننا چناک درملکی مواد آتے اُریرہ۔ اوپارے کہ پی ٹی وی ٹی چناتا مواد نا بابت گام گیج کننگ انگ ءِ۔ اوپارے کہ پاکستان نا الس نا آگاہی کن خبرآتا اصل جزئیت آتے سرمننگ المی ءِ وخت اس کہ الس نا تفریح نا بابت ڈیمانڈ ءِ پورو کننگ نا کوشست کننگ انگ ءِ۔