سمندر و ساحل سمندر ءِ ساف تخسا ہی نن قدرتی نظام نا رکھ ءِ کننگ کینہ، بنجائی وزیر سینیٹر شیری رحمان نا کلہو

اسلام آباد۔ 08 جون (اے پی پی) بنجائی وزیر چاگڑدی بدلی سینیٹر شیری رحمان پارینے کہ سمندر آتیٹی کچٹی و فضلہ ٹی ودکی بھلو گڑتی اسے، دا کچٹی نئے بیرہ سمندری حیات بلکن خشکی آ رہینگوک آ ساہدار تے زہمی کیک، سمندر و ساحل سمندر ءِ ساف تخسا ہی نن قدر ت نا دا بڑزکونظام نا رکھ ءِ کننگ کینہ۔ سمندر آتا جہانی دے انا وخت آ تینا کلہو اٹی بنجائی وزیر پارے کہ اینو مچ آ دنیا ٹی سمندر نا جہانی دے ءِ اڈتننگ انگ ءِ، پاکستان  سمندر نا جہانی دے ءِ خاص وڑاٹ اڈایتے، نن ہمو خوش نصیب ملک آتیٹی اوار اُن ہرافتا سیم سمندر تون لگک، ننے خاص وڑاٹ تینا سمندر نا اہمیت، اوڑتون گنڈوک حیاتیات و چاگڑدی پلوآتے تالان کروئی ءِ۔ اوپارے کہ ڈغار نا کچ انا کم وود 70 درسد دیر اٹ ڈکوک ءِ، ننا دھرتی آ ساڑی دیر انا  کم وود 69.5 درسد سمندر آتا دیر آ تالان ءِ، سمندر ننا سیارہ نا 50 آن 75 درسد آکسیجن ودی کیک، نناڈغار نا موسم، چاگڑد و پِرک سمندر آہی منحصر ءُ، بدلہ ٹی نن سمندر آتے فضلہ و پلاسٹک آتا ڈھیر اس جوڑ کرینن، داوخت آسمندر آتیٹی ناقابل فہم کچ اٹ پلاسٹک ساڑی ءِ۔ شیری رحمان پارے کہ سٹڈیز نا رداٹ بیرہ سمندرآتا کہولی دیر تیٹی 51 ٹرلین پلاسٹک نا ٹکر ساڑی ءِ ۔ شیری رحمان پارے کہ ساحل سمندر و سمندر ءِ تینا اُراغانبار ساف ستھرا تخنگے۔