مسافر وین شکست، لاش آتے درستی راستی آن پد خاہوت آتا دوٹی تننگ انگ ءِ، ڈپٹی کمشنر قلعہ سیف اللہ

قلعہ سیف اللہ۔ 08 جون (اے پی پی) ڈپٹی کمشنر قلعہ سیف اللہ حافظ محمد قاسم کاکڑ ریسکیو آپریشن ءِ پورو کننگ آن پد ڈی ایچ کیو ہسپتال قلعہ سیف اللہ ٹی میڈیا تون گپ وتران کرسا پارے کہ قلعہ سیف اللہ نا علاقہ اخترزئی نا ہند آ مسافر ویگن نا تمنگ نا شکست چارشنبے ناسہب اتون ہشت ءُ نیم بجہ نا خڑک آ پیش بس و درستی راستی آن پد لاش آتے خاہوت آتا دوٹی تننگ انگ ءِ، مسافر ویگن براستہ اختر زئی لورالائی آن ژوب آ ہناکہ کہ شکست نا گواچی مس۔ اوپارے کہ مسافر وین اٹ کل 23 مسافر سوار ئسر ہراٹی 22 مسافر ہمووخت آ زوال کریر و اسہ بھاز ٹھپی  ءِ کوئٹہ غا گدریفنگانے۔ ہرانا حالیت نازرک پاننگانے، اوپارے کہ ضلعی انتظامیہ ، لیویز و پولیس نا ورنا، 1122 نا کارندہ، ہسپتال انتظامیہ و ہندی بندغ آک کمکی کاریم اٹ پبی بشخ ہلکر ولے سخت انگا و مشی آ علاقہ مننگ نا سوب آن ریسکیو نا کاریم اٹ کیہی گھنٹہ لگا ۔