خیبر پختونخواہ نا الس ءِ اڑزآن نت انا فراوانی، وزیراعظم شہباز شریف نا قول آ عملدرآمد بناکرے، بنجائی وزیر حوالکاری و شینکاری

اسلام آباد۔ 08 جون (اے پی پی) وزیراعظم شہباز شریف نا خیبرپختونخوا نا الس ءِ اڑزآن نُت انا ففراوانی نا قول آ عملدرآمد کرسا خیبرپختونخوا ٹی ’’شہباز سپیڈ‘‘ اٹ اڑزآن نت انا فراوانی  نا بناءِ کننگانے۔ بنجائی وزیر حوالکاری و شینکاری مریم اورنگزیب چارشنبے نادے آ وزیراعظم نا اڑزآن نُت انا فراوانی نا قول  پورو مننگ نا سرجم آتے جاری کرے۔ اوپارے کہ وزیراعظم شہبازشریف نا پرمان آ خیبرپختونخوا ٹی 40 روپئی فی کلو نُت انا فراوانی نا چرجوئی نابناءِ کننگانے، دا چرجوئی ٹی 100 موبائل اسٹور کاریم نا بناءِ کرینو، الس ءِ اڑزآن نت انا فراوانی کن صوبہ خیبرپختونخوا ءِ ایبٹ آباد و پشاور زون تیٹی بشخنگانے۔ اڑزآن نت انا فراوانی نا منظم چرجوئی پدریسہ مچ آ خیبرپختونخوا ٹی تالان کننگک۔ ابیٹ آباد  و پشاور زون اٹی نُت انا تھیلہ 50 ہزار آن زیات بہا کننگا، ایبٹ آباد و پشاور زون تیٹی جتا جتا موبائل اسٹور تا کمک اٹ اڑزآن نُت فراوان کننگ انگ ءِ۔ اوپارے کہ ایبٹ آباد اٹی اِرا دے اٹی اڑزآن نُت انا 22 ہزار 70 تھیلہ بہاکننگا وخت اس کہ پشاور زون اٹی اِرادے اٹی اڑزآن نت انا 23 ہزار 400 آن زیات تھیلہ بہا کننگا۔ اوپارے کہ خیبرپختونخوا نا الس ءِ 40 روپئی کلو نُت انا فراوانی کن 13 جون اسکان موبائل اسٹور تا کچ ءِ وفسا 200 کننگک، 9 جون اسکان صوبہ خیبرپختونخوا ٹی نت انا بہا نا عارضی سیل پوائنٹ ہم کاریم نا بناءِ کیرہ، 17 جون اسکان خیبرپختونخوا ٹی دا عارضی سیل پوائنٹ آتا کچ  ءِ ودفسا 500 کننگک، خیبرپختونخوا ٹی اڑزآن نُت انا بہا نا 993 ہند آتے 2000 اسکان ودفنگک۔ بنجائی وزیر پارے کہ وزیراعظم شہباز شریف خیبرپختونخوانا غیرت مند الس تون تینا قول ءِ پورو کرسا نشان تسنے، خیبرپختونخوا نا نرزور الس نا زند اٹی آسانی اتنگ و8 سال آن اوفتا صوبہ ٹی سلوک شونداری نا عمل ءِ ہم انشاء اللہ مون آ دینہ۔