وزیراعظم خیبرپختونخوا غان خننگوک آ گیس کوڑی تیان الس ءِ گیس انا دمدستی فراوانی نا منظوری ءِ تس

اسلام آباد۔ 07 جون (اے پی پی) وزیراعظم شہباز شریف خیبرپختونخوا غان خننگوک آ گیس انا کوڑی تیان الس ءِ گیس انا دمدستی فراوانی نا منظوری ءِ تس۔ وزیراعظم آفس آن جاری بیان نا رداٹ وزیراعظم تون فوجی فاؤنڈیشن پڑک نا چیئرمین وقار احمد ملک و ماڑی پیٹرولیم نا سروک فہیم حیدر ئسک سے شنبے نادے آ داڑے اوڑدہی کریر۔ وزیر مملکت پیٹرولیم سینیٹر ڈاکٹر مصدق ملک و سیکرٹری پیٹرولیم ئسک ہم اوڑدہی ٹی ساڑی ئسر۔ وزیراعظم توانائی نا کاختی نا مون ءِ توننگ کن مسکوہی قبائلی علاقہ غاتیان خننگوک آ گیس  ءِ دمدستی وڑٹ الس ءِ تننگ نا منظوری ءِ تس۔ خیبرپختونخوا نا علاقہ بنوں آن دہ کھرب کیوسک فٹ گیس انا کوڑی خننگاسس۔ وزیراعظم دا کوڑی تے الس ءِ گیس انا کاختی آن نجات ترفنگ کن کاریم اٹ اتنگ نا پارت کرے۔ وزیراعظم ءِ قطبی وزیرستان ، بنوں ٹی پوسکن خننگوک آ کوڑی تا بارواٹ ہم حوال تننگا۔ وزیراعظم ءِ گیس انا بشخ انا جم حالیت، طلب و رسد آن معلومدار کننگا۔ وزیراعظم تعلقدار علاقہ غاتا الس ءِ ہم خننگوک آ گیس انا بھرم تے فراوان کننگ و علاقہ نا شونداری ، راجی آسودہی، تعلیم، جان جوڑی نا بابت سلاہ و سوج پیش کننگ نا ہم پارت کرے۔ وزیراعظم پارت کرے کہ اودے معلومدار کننگے کہ ہرا علاقہ غاتیان گیس پیش تمانے ہموجاگہ نا الس و چناتے انت ملک۔