پاکستان و جرمنی نا تین پہ تینی تعلقداری تے پین سوگو کننگ آ امنا، وزیر خارجہ نا جرمن ہم منصب تون پریس کانفرنس

اسلام آباد۔ 07 جون (اے پی پی) پاکستان وجرمنی تین پہ تینی ہڑتوم آ کنڈآتا تعلقداری تے پین سوگو کننگ آ امنا کرینو۔ دا امنائی سلاہ سے شنبے نادے آ داڑے ہڑتوم آ ملک آتا وزیر خارجہ غاتا نیام اٹ دفترخارجہ ٹی مروک آ اوڑدہی ٹی کننگا۔ وزیرخارجہ بلاول بھٹو زرداری و جرمنی نا وزیر خارجہ انالینا بیئربوک اوڑدہی آن پد اسیجائی پریس کانفرنس آن تران کرسا پارے کہ ہڑتوم آ ملک آک ہڑتوم آ کنڈآتا تین پہ تینی کمکاری ءِ پین مون آ دینہ۔ وزیرخارجہ بلاول بھٹو زرداری جرمن وزیر خارجہ ءِ پاکستان اٹ بخیر کرسا پارے کہ پاکستان و جرمنی نا نیام اٹ دیرینہ تعلقداری ءِ ، نن یورپی یونین اٹی ہم پارنٹر اُن، ہڑتوم آملک آک اوغانستان اٹی امن و سوگوی و انسانی تنکی ءِ توننگ ن اواری اٹ کاریم کیرہ۔ اوپارے کہ جرمن وزیر خارجہ تون ہڑتوم آ کنڈآتا تعلقداری، واپار و زرکاری آن بیدس دفاعی کمکاری ءِ ودفنگ آ گپ وتران کریر۔ اوغانستان نا حالیت آتا ہم گپ وتران اٹی سجفنگا۔ اومقبوضہ کشمیر اٹی انسانی حق انا بھلا خلاف ورزی آن ہم جرمنی نا وزیر خارجہ ءِ معلومدار کرینے۔ بلاول بھٹو زرداری پارے کہ نن پرامن و شونہال اوغانستان اس خوانہ۔ جرمنی نا وزیر خارجہ دا وخت آ پارے کہ اوغانستان نا حالیت آتا اثر اونا سیم تیان پیشن ہم مرتب مریک۔ اوپاکستان اٹی پرجوش خیرمقدم آ وزیر خارجہ بلاول بھٹو نا منت واری ءِ ہرفے۔ اوپارے کہ پاکستان بھلو کچ اسے ٹی اوغانستان نا باہوٹ آتے بھلو وخت اسے آن پناہ تسنے و او جرمنی تون اوار چندی ملک آتا شاری تا اوغانستان آن ساڑی آ پیش تمنگ اٹ کمک کرینے۔ اوپارے کہ ساڑی حالیت آتیٹی اوغانستان نا الس ءِ تنیا الیپنہ۔ داکان مست پاکستان و جرمنی نا وزیر خارجہ غاتا نیام اٹ اوڑدہی ٹی ہڑتوم آ ملک آتا تعلقداری، علاقائی و جہانی امور آ گپ وتران کننگا۔ جرمنی نا وزیر خارجہ امور الینا بیئربوک نا پاکستان نا دا اولیکو دورہ ءِ، جرمن وزیر خارجہ تیناپاکستانی ہم منصب بلاول بھٹو زرداری نا سلہ غا اسلام آباد نا 2 دے ئی دورہ ءِ کننگ ءِ۔ جرمنی نا وزیرخارجہ دورہ ٹی وزیراعظم و ایلو حکومتی عہدیدار آتون ہم اوڑدہی کیک۔ دا ہیت ذکر انا قابل ءِ کہ جرمنی ہڑتوم آ کنڈآتا و یورپی یونین نا رداٹ پاکستان نا قابل قدر شریدار ءِ۔ پاکستان وجرمنی نا نیام اٹ دیرینہ، خوشگوار تعلقداری جوڑ ءِ ہرا تین پہ تینی شرف و خڑکی کمکاری آ مبنی ءِ، پاکستان وجرمنی تدوک آ سال سفارتی تعلقداری تا 70 سال ءِ پورو کرے۔ جرمنی نا وزیر خارجہ انا لینا بیئر بوک نا دورہ پاکستان ہڑتوم آ ملک آتا نیام اٹ بڑزکو کہول انا باقاعدہ تبادلہ غاتا بشخ اسے و اومیت ءِ کہ داڑآن پاکستان و جرمنی نا کثیر جہیتی تعلقداری تے پین مون آ دننگک۔