حکومت پولیس ءِ گچین فورس اس جوڑ کننگ کن غٹ وسیلہ غاتے فراوان کیک، وزیراعلیٰ بلوچستان

کوئٹہ۔ 07 جون (اے پی پی) وزیراعلیٰ بلوچستان میر عبدالقدوس بزنجو پارینےکہ حکومت پولیس ءِ گچین فورس اس جوڑ کننگ کن غٹ وسیلہ غاتے فراوان کیک، پولیس کارندہ غاتا کسبی لائخی تیٹی ودکی کن اوفتا ٹریننگ آ خاص چکار کننگے۔ داخیال آتا درشانی ءِ پوسکن تعینات مروک آ آئی جی پولیس بلوچستان عبدالخالق شیخ تون اوڑدہی ٹی گپ وتران کرسا کرے۔ اوڑدہی ٹی وزیراعلیٰ بلوچستان میر عبدالقدوس بزنجو ءِ آئی جی پولیس ناکنڈآن بلوچستان پولیس نا کسبی امور و امن و ایمنی آ حوال تس۔ وزیراعلیٰ پارے کہ دیرپاامن و الس نا جان و مال انا رکھ حکومت نا اولیت ءِ۔ دہشت گردی نا چٹفنگ کن پولیس نا قربانی و کوشست ستاکڑزک۔ اوپارے کہ الس دہشت گردی نا برخلاف جنگ اٹ پولیس فورس انا قربانی تا قدر ءِ کیک۔ امن و ایمنی و ڈوہ انا چٹفنگ اٹ پولیس و الس نا نیام اٹ سوگو و مربوط تعلق و کمکاری المی ءِ۔ میر عبدالقدوس بزنجو پارے کہ پولیس فورس تیناکڑد و اخلاق نا کمک اٹ الس ناپت ءِ دوئی کے چیکنگ نا وخت آ پولیس الس نا عزت نفس ءِ ہر حال اٹ برقرار تخے۔