اسلام آباد۔ 07 جون (اے پی پی) بنجائی وزیر حوالکاری و شینکاری مریم اورنگزیب پارینے کہ وزیراعظم شہباز شریف اینو بزنس کانفرنس اٹی پاکستان نا زرگزرانی شونداری و شونہالی کن تینا وژن ءِ کاروباری برادری نا مون آ پیش کیک۔ سے شنبے نادے آ تینا اسہ بیان اسے ٹی اوپارے کہ وزیراعظم شہباز شریف اینو بزنس کانفرنس آن تران کیک۔ بزنس کانفرنس اٹی مچ آ ملک آن کاروباری برادری بشخ ہلنگ ءُ۔ وزیراعظم کاروباری برادری تون بجٹ آ اہم سلابت ہم کیک۔ اوپارے کہ کشت وکشار ، فوڈ سیکورٹی ، توانائی، آئی ٹی ، ٹیکسٹائل ، مینو فیکچرنگ ، برآمد و ایلو بشخ آتیان تعلق تخوک آکاروباری خواجہ غاک کانفرنس اٹی بشخ ہلنگ ءُ۔ اوپارے کہ وزیراعظم کانفرنس اٹی میثاق زرگزران کن نیشنل ڈائیلاگ نا بناءِ کیک۔ وزیراعظم کاروباری شخصیت آتیان سلاہ ہلیک و تینا حکومت نا آخبت نا لائحہ عمل آ پت اٹ ہلیک۔ اوپارے کہ وزیراعظم کانفرنس اٹی ملک ءِ مون تروک زرگزرانی ویل آتا ایسری کن دمدستی، نیامی و مریس مدتی گام گیج آتیا گپ وتران کیک۔ داکان بیدس وزیراعظم مالی سال 2022-23کن بجٹ سلاہ ہم دوئی کیک۔ اوپارے کہ وزیراعظم شہباز شریف نا وژن اسہ ہندن ءُ پاکستان اس جوڑ کننگ ءِ ہراڑے زرگزران شون ہلے، سوگو و پائیدار بنداو تیا شونداری مرے، ہر پاکستانی و ملک انا ہر ڈیہہ داٹی حصہ دار مرے، ہراڑے نیزگاری و محرومیک چٹر۔ بنجائی وزیر حوالکاری پارے کہ وزیراعظم ہندن ءُ پاکستان اس جوڑ کننگ خواہک ہراڑے شاری تے راجی ، سیاسی و زرگزرانی حق دوبرے، زند انا خرینی تیان نجات ملے و اوفتے اسہ گچین ءُ زند اس دُوبرے۔
