وزیراعظم شہباز شریف نا پارت آ جاپانی کمپنی تے مون تروک ویل آتا ایسری کن ہلہلہ ئی بنداو تیا کمیٹی اس جوڑ

اسلام آباد۔ 06 جون (اے پی پی) وزیراعظم شہباز شریف نا پارت آ پاکستان اٹ جاپانی کمپنی تے مون تروک غٹ  ویل آتا ایسری کن ہلہلہ ئی بنداو تیا کمیٹی اس جوڑ کننگانے وخت اس کہ وزیراعظم پارت کرینے کہ جاپانی کمپنی تے مون تروک غٹ ویل آتے اسہ ہفتہ نا تہہ ٹی ایسر کرسا اودے رپورٹ پیش کننگے، ایکسپورٹ پراسیسنگ زون تے خراج فری کننگ کن دمدستی گام گیج کننگے۔ دوشنبے نادے آ وزیراعظم میڈیا آفس آن جاری بیان نا رداٹ وزیراعظم تون جاپانی کمپنی تا ڈل اس اوڑدہی کرے۔ داوخت آ وزیراعظم پارے کہ جاپانی ڈل ءِ سلہ خلینہ کہ او پاکستان اٹ زرکاری و واپار نا مون آ دننگ کن پاکستان نا زوت دورہ ءِ کے، پاکستان اٹ جاپانی کمپنیک تینا زرکاری آن ایکسپورٹ انڈسٹری نا جوڑ کننگ آ کاریم کیر، تھر اٹی کولا، چنیو ٹ آن اَین انا کوڑی، قابل تجدید توانائی، انفراسٹرکچر و پبلک ٹرانسپورٹ اٹ زرکاری و کمکاری نا بھلو وارخواہی اس ساڑی ءِ۔ دا اوڑدہی وزیراعظم نا غٹ ہندی و جہانی کاروباری و واپاری اسٹیک ہولڈر آتیان بجٹ نا چرجوئی ٹی اوڑدہی نا اسہ کڑی اسے۔ جاپانی ڈل اٹی پاکستان اٹ جاپان نا سفیر میتسو ہیر وواڈا، جاپانی کمرشل اتاشی و غٹ بھلا صنعتی و واپاری بشخ آتیٹی کاریم کروک آ جاپانی کمپنی تا نمائندہ غاک بشخ ہلکر۔ داکان بیدس دیوان اٹی بنجائی وزیر خرم دستگیر ، مفتاح اسماعیل، مخدوم مرتضیٰ محمود و تعلقدار بڑزکوکمامدارآک ہم بشخ ہلکر۔ جاپانی کمپنیک وزیراعظم شہباز شریف نا ویژن نا رداٹ ساڑی حکومت نا کاروبار دوست پالیسی تیا پور پت انا درشانی ءِ کریر۔ داکان بیدس جاپانی کمپنیک الیکٹرک وہیکل مینو فیکچرنگ ، فوڈ پراسیسنگ ، اسپیشل اکنامک زون، ٹیکسٹائل سیکٹر، ٹیلی کمیونیکیشن سیکٹر و آٹو پارٹس مینو فیکچرنگ نابشخ آتیٹی زرکاری ءِ ودفنگ اٹ بھاز است خواہی نا درشانی ءِ کریر۔ پاکستان و جاپان 2022 اٹی سفارتی تعلقداری تا جوڑ مننگ نا 70 سال دے ءِ اڈتننگ  ءُ۔ وزیراعظم پارے کہ جاپان نا شونداری مچ آ دنیا کن درور اسے۔ جاپان کمکاری ءِ مون آ درسا پاکستان جاپان نا آزموندہ غان فائدہ ہرفنگ کیک۔