اسلام آباد۔ 06 جون (اے پی پی) بنجائی وزیر کانود و انصاف سینیٹر اعظم نذیر تارڑ ہڑتوم آ کنڈآتا تعلقداری تے پین مون آ دننگ نا عزم انا درشانی ءِ کرسا پارینے کہ یورپی یونین مدام پاکستان نا مخلوق نا آسودہی و نظام نا گچینی کن تینا کڑد ءِ ادا کرینے۔ دوشنبے نادے آ وزارت کانود و انصاف آن جاری بیان نا رداٹ پاکستان اٹ یورپی یونین نا ڈل انا قائم مقام ناظم الامور تھامس سیلر بنجائی وزیر کانود و انصاف سینیٹر اعظم نذیر تارڑ تون اوڑدہی کرے۔ اوڑدہی ٹی تین پہ تینی است خواہی نا امور آتیا شرہ مس۔ وزیر کانود پارے کہ پاکستان نا یورپی یونین تون سوگو راجی و سیاسی تعلقداری ءِ، یورپی یونین مدام پاکستان نا مخلوق نا آسودہی و نظام نا گچینی کن تینا کڑد ءِ ادا کرینے۔ فریق آک ہڑتوم آ کنڈآتا تعلقداری تے پین مون آ دننگ نا درشانی ءِ کریر۔ تھامس سیلر پاکستان اٹ انسانی حق و زالبول آتا حق اکن مروک آ کانود سازی نا ستاءِ کرے۔ وزیر کانود انصاف اٹ راج انا جوڑ کننگ کن اسہ سوگو ءُ نظام انصاف اسے نا اہمیت ءِ تالان کرے۔ بنجائی وزیر کانود بار انا کہول آ ورناوکیل آتا پدریسہ برجاتربیت نا اہمیت ءِ ہم تالان کرے۔ تھامس سیلر بارلیول آ ورناوکیل آتا تربیت نا بابت یورپی یونین ناپبی کمکاری نا باوری کرفے۔ لاہور ہائیکورٹ بار اٹی تین پہ تینی کمکاری آن سینٹر فار ایکسیلینس اس جوڑ کننگ آ ہم امنا کننگا۔ سینٹر فار ایکسیلینس اٹ ورناوکیل آتے ٹیکنیکل و پروفیشنل سپورٹ فراوان کننگک۔ لاہور ہائی کورٹ بار اٹ دا اولیکو پائلٹ پروجیکٹ مریک ہرا داکا ن پد خیبرپختونخوا، بلوچستان و مر مر انگا علاقہ غاتیٹی ہم بناکننگک۔
