اسلام آباد۔ 06 جون (اے پی پی) بنجائی وزیر حوالکاری و شینکاری مریم اورنگزیب بی جے پی راہشون تا نبی کریم صلی اللہ علیہ و آلہ وسلم نا شان اٹی گستاخانہ بیان تا ترند انگا لوز آتیٹی مذمت ءِ کرسا پارینے کہ خاتم المرسلین نبی رحمت خواجہ محمد صلی اللہ علیہ و آلہ وسلم نا ناموس اٹی گستاخی کرسا بی جے پی نا راہشونک تینے پست پک کرینو۔ دوشنبے نادے آ تینا بیان اٹی اوپارے کہ دنیا نا غٹ انسان تیکن رحمت جوڑ مرسا بروک آ نبی اکرم صلی اللہ علیہ و آلہ وسلم نا پاک سیرت و کڑد انا مطالعہ کروک آ اسہ ہم سلیم الفطرت انسان اس اونا شرف و ادب ءِ کننگ آن بیدس سلپک۔ اوپارے کہ بی جے پی راہشون تا گستاخانہ بیان تا ترند انگا لوز آتیٹی مذمت ءِ کینہ، دا بی جے پی نا انتہاپسندانہ و فتنہ پرور سوچ انا اسہ پین شاہدی اسے۔ مریم اورنگزیب پارے کہ جہانی برادری بین المذاہب ہم آہنگی و مقدس ہستی تا شرف نا جہانی تحریک آن چپ بھارتی حکومت نا رویہ و گام گیج آتا نوٹس ءِ ہلے۔ اوپارے کہ بھارت اقلیت خاص وڑاٹ مسلمان تا بنداوی حق، مذہبی آجوئی و بنداوی انسانی حق آتا ڈوہدار ءِ۔ اودے اونا کروک نا سزا تننگے۔ بنجائی وزیر حوالکاری پارے کہ ہرمسلمان تینا آقا کریم صلی اللہ علیہ و آلہ وسلم نا عزت و حرمت ءِ تینا جون آن زیات دوست سمجھک و دامسخت کن کہینگ کن تیار ءِ۔
