اسلام آباد۔ 06 جون (اے پی پی) پاکستان خواجہ صلی اللہ علیہ و آلہ وسلم نا بارواٹ بھارت نا حکمران بھارتیہ جنتا پارٹی نا اِرا سینئر عہدیدار آتا توہین آمیز ریمارکس نا ترند انگا لوز آتیٹی مذمت ءِ کرسا بھارتی ناظم الامور ءِ وزارت خارجہ غا بٹنگسا سخت برانز کرینے۔ دوشنبے نادے آ وزارت خارجہ نا ترجمان نا کنڈآن جاری بیان نا رداٹ بھارتی ناظم الامور ءِ معلومدار کننگا کہ دا ریمارکس پورو وڑاٹ ناقابل قبول ءِ و داڑآن نئے بیرہ پاکستان الس بلکن مچ آ دنیا نا مسلمان تا جوزہ غاتے بھاز ٹھیس رسینگانے۔ بھارتی سفارت کار ءِ پاننگاکہ پاکستان بی جے پی حکومت نا کنڈآن ہندا عہدیدار آتا برخلاف تاخیری و بے کار تادیبی گام گیج آتیا است ہسونی نا درشانی ءِ کیک ہراڑآن مسلمان تا دڑد ءِ کم کننگ مفک۔ بیان اٹی پاننگاکہ پاکستان ءِ بھارت اٹی مسلمان تا برخلاف فرقہ وارانہ بیدادی و خار اٹ خطرناک حداسکان دکی آ بھاز گڑتی ءِ، بھارت اٹی مسلمان تے سجفوک وڑاٹ بدنام کننگ انگ ء،، اوفتے پسماندہ تخنگ انگ ءِ و اوفتے بنداو پرست ہندو ہجوم نا منظم جلہو نا شست کننگ انگ ءِ ہراٹی انتہاپسندآتے بھارت نا چندی ریاست آتا سیکورٹی ادارہ غاتا پورو مخ تفی دوئی ءِ۔ ترجمان پارے کہ بھارت اٹی مسلم مخالف جوزہ غاتا ودنگ و مرکزی دنگ اٹ اوار مننگ تون اوار اوار فضول تاریخی دعویٰ تا حوالہ ءِ ترسا مسلمان تے اوفتا پیڑی تیا متکن عبادت گاہ تیان محروم کننگ نا ودوک آ کوشست بھارتی راج اٹ اسلاموفوبیا نا پیدوار نتیجہ غاتیان بیدس ہچ اس اف۔ بیان اٹی پاننگانے کہ پاکستان بی جے پی نا سرکڑدہ و بھارتی حکومت آن ترندی اٹ خواست کیک کہ او بی جے پی نا عہدیدار آتا توہین آمیز ریمارکس نا پیدوار وڑاٹ مذمت ءِ کے و داہیت ءِ پک کے کہ اوفتا برخلاف فیصلہ کن و قابل عمل کارروائی نا کمک اٹ اوفتیان جوابدہی کننگے۔ بھارتی حکومتءِ جہانی کانود نا رداٹ تینا زمواری تا بارواٹ ہم یات ترفسا پاننگاکہ او اقلیت آتے انسانی حق انا خلاف ورزی تیان بچفنگ کن دمدستی گام گیج کے، اوفتا رکھ، سلامتی و آسودہی ءِ پک کے و اوفتے امن تون تینا عقیدہ غاتیا چلینگ انگ و اوڑآ عمل کننگ نا موکل تننگے۔ پاکستان جہانی برادری خاص وڑاٹ اقوام متحدہ، او آئی سی و انسانی حق انا تنظیم تیان خواست کرے کہ او بھارت اٹ خطرناک حداسکان ودوک ’’ہندو توا‘‘ آن زہمی اسلاموفوبیا نا نوٹس ءِ ہلسا اودے توریر و بھارت اٹی اقلیت آتا برخلاف انسانی حق انا منظم خلاف ورزی تے توننگ کن بھارتی کمامدارآتیا زور شاغر۔
