اسلام آباد۔ 06 جون (اے پی پی) سپریم کورٹ پوسکن آ حلقہ بندی تا بابت الیکشن کمیشن نا شیڈول نا برخلاف پاکستان تحریک انصاف (پی ٹی آئی) نا کنڈآن دائر درخواست آ سماعت ءِ 13 جون 2022ء اسکان پدبٹسا پی ٹی آئی ءِ بروک آ سماعت اسکان متفرق و ترمیم مروک درخواست آتے یکجا کرسا جمع کرفنگ نا پارت کرے۔ دوشنبے نادے آجسٹس اعجاز الاحسن نا کماشی ٹی مسہ باسکی بنچ ہندا درخواست آ سماعت کرے۔ سماعت اٹی تحریک انصاف نا وکیل فیصل چوہدری موقف اختیار کرے کہ حلقہ بندی تا شیڈول آ ترندی اٹ عملدرآمد برجاءِ، پوسکن آ حلقہ بندی تے آرٹیکل (5)51نا رکھ دوئی اف۔ داوخت آ جسٹس اعجاز الاحسن ریمارکس تس کہ رپورٹ آتا رداٹ الیکشن کمیشن تعلقدار کمامدارآتا کنڈآ ہُننگ ءِ ، الیکشن کمیشن اَریفنگ ءِ کہ 2021ء نا مردم شماری ہراتم اسکان پورو مریک، الیکشن کمیشن ورندی ملنگ آ فیصلہ کیک کہ حلقہ بندی ہرامردم شماری آ مریک۔ جسٹس منیب اختر داوخت آ ریمارکس تس کہ درخواست اٹی ترمیم نا موکل تسوسن ولے درست وڑاٹ دائر متنے، انت نن وخت اس اسہ فائل آن کاغد آتے پٹینہ و وخت اس ایلو فائل آن ۔ عدالت تحریک انصاف ءِ متفرق و ترمیم مروک درخواست آتے یکجا کرسا بروک آ سماعت اسکان جمع کرفنگ نا پارت کرسا باندات آ سماعت ءِ 13 جون 2022 ء اسکان پدبٹے۔
