تدوک آ حکومت گوادر اٹی دیر و بجلی نا ہر ڈٹ ءِ پورو کننگ اٹ بے سہب مس، ارب آ روپئی و نہادی وخت ءِ زیان کرے، وزیراعظم

اسلام آباد۔ 04 جون (اے پی پی) وزیراعظم شہباز شریف پارینے کہ تحریک انصاف نا حکومت گوادر اٹی دیر و بجلی نا ہرڈٹ ءِ پورو کننگ اٹ بے سہب مس ، ارب آ روپئی و نہادی وخت ءِ زیان کرے ، گوادر بالی پٹ و گوادر بندرگاہ نا حالیت آک جوان افس، پاکستان اٹی شونداری بلوچستان اٹی امن ، سوگوی و شونداری تون گنڈوک ءِ۔ ہفتہ نادے آ تینا ٹویٹ اٹی وزیراعظم پارے کہ گوادر نا دورہ ٹی ای خناٹ کہ ہراوڑ پی ٹی آئی حکومت گوادر نامخلوق ءِ مایوس کرے۔ ارب آ روپئی و نہادی وخت ءِ زیان کننگا۔ گوادر نا بندرگاہ کن بھلو قربانی تروک آ ہندی بندغ آتیکن دیر و بجلی نا ویل آتا ایسری کن اسہ ڈٹ اسے ہم پورو کننگتو۔ وزیراعظم پارے کہ گوادر نا بندرگاہ و گوادر بالی پٹ انا تفنگ نا حالیت آک ہم سہی افس ۔ بندرگاہ غا ہچ ءُ ڈریجنگ اس کننگتو ہرانا سوب آن بھلو کارگو جہاز اس لنگر انداز مننگ کپک۔ وزیراعظم پارے کہ گوادر یونیورسٹی، بالی پٹ و کنوئی آ ساف دیر اکن ڈی سیلی نیشن پلانٹ نا خلنگ نا زوت پوروی نا پرمان کرینن ۔ اوپارے کہ پاکستان نا جم شونداری بلوچستان نا امن، سوگوی و شونداری تون گنڈوک ءِ۔ سیوتی حکومت بلوچستان نا صوبائی حکومت و ہندی سرکڑدہ غاتون اواری اٹ آخبت نا لائحہ عمل نا تعین کن سنبرینگوک ءِ۔