حکومت گچین کاری تیان مست الس ءِ مون تروک ویل آتا ایسری کن گونڈ مدتی گام گیج کیک، وزیراعظم نا ترک ٹی وی ءِ انٹرویو

اسلام آباد۔ 03 جون (اے پی پی) وزیراعظم شہباز شریف بروک آ گچین کاری تیان مست کبینی و نیزگاری ٹی کمتی کن گونڈ مدتی گام گیج کننگ نا عزم انا درشانی ءِ کرسا پارینے کہ ملک اٹی بروک آ لس گچین کاریک 15 تُو اٹی مریرہ، و داٹی دانا ہدف کبینی و نیزگاری نا چیلنج آتون مون تننگ ءِ، حکومت ءِ جہانی کہول آ ایندھن نا ودوک آ نہاد آک تیل و گیس انا نہاد آتیٹی ودکی کننگ آ بیوس کرینو۔ انقرہ نا تینا مسہ دے ئی سرکاری دورہ ٹی ترکی نا سرکاری ٹیلی ویژن ’’ٹی آرٹی ‘‘ ءِ انٹرویو ترسا وزیراعظم پارے کہ کنا وژن پاکستان نا پوسکن جوڑ کننگ، نیزگاری ٹی کمتی اتنگ و کفایت شعاری ءِ پک کننگ کن سرکاری بشخ انا بجٹ اٹی کٹوتی کن تینا پورو کوشست ءِ کننگ ءِ۔ وزیراعظم شہباز شریف داہیت آ زور شاغسا پارے کہ اونا حکومت گچین کاری تیان مست الس ءِ مون تروک ویل آتا ایسری کن گونڈ مدتی گام گیج کیک۔ اوپارے کہ اگہ بروک آ لس گچین کاری تیٹی اونا جماعت الس نا مرضی نا رداٹ اقتدار اٹی بریک تو بے روزگاری و نیزگاری کون آ ویل آتون مون تننگ کن اسہ پورو شونداری ایجنڈا سے نا بناءِ کننگک۔ وزیراعظم پارے کہ جہانی کہول آ ایندھن نا آسمان تون ہیت کروک نہاد آک حکومت ءِ تیل و گیس انا نہاد آتیٹی ودکی کننگ آ بیوس کرینو۔ وزیراعظم پاکستان نا سیاسی حالیت آتا بارواٹی اَریفوک آ اسہ سوج اسے نا ورندی ٹی پارے کہ ملکی تاریخ اٹ اولیکو وار بے پتی نا وونٹ سرسہب مسنے، دا اقتدار نا اسہ آئینی و کانودی گدریفنگ اسے ہرا آئین اٹی فراوان کننگانے۔ اوپارے کہ دا اسہ ’’کوانٹم جمپ‘‘ اسے نا جاگہ غا اسہ بھلو گام اسے۔ وزیراعظم زور شاغسا پارے کہ پاکستان اٹی دا اسہ قابل قبول معمول اس مریک کہ اگہ پارلیمنٹ باسک آتا گیشتری محسوس کیک کہ اسہ خاص حکومت اس مرے ، تو اوفتے ملک انا کانود نا رداٹ آجو وڑاٹ وونٹ تننگ نا موکل مرے۔ اوپارے کہ داکان مست مستین اٹ ہنداوڑنا حالیت آتیٹی مارشل لا و فوجی مداخلت نا مشاہدہ مسنے ولے داسہ او مچ آ حالیت آتے بدل کرینے و اونا مخ تفی ءِ بایدے کننگے۔ وزیراعظم شہباز شریف پارے کہ پاکستان و ترکی بے پناہ افہام و تفہیم اتون علاقائی کمکاری نا روڈ میپ آ روان ءِ و ہڑتوم آ ملک آتا سرکڑدہ غاتا نیام اٹ یکجہتی ءِ۔