اسلام آباد۔ 02 جون (اے پی پی) اسپیکر قومی اسمبلی راجہ پرویز اشرف پارینے کہ پاکستان و چین نا نیام اٹ 17 سال انا اسٹریٹجک تعلقداری ءِ، پاکستان وچین مشکل حالیت آتا سنگت ءُ، ذوالفقار علی بھٹو چین پاکستان تعلقداری نا جوڑ کروک ءِ۔ داخیال آتا درشانی ءِ او پنچ شنبے نادے آ پاک چائنا سی پیک میڈیا فورم آن تران کرسا کرے۔ اوپارے کہ بے نظیر بھٹو و مسکوہی صدر آصف علی زرداری چین نا دورہ ءِ کرے، مارچ 2013 ء ٹی گوادر پورٹ ءِ چین نا کمک اٹ آپریشنلائز کننگا، سی پیک نا کمک اٹ انفراسٹرکچر و السی آسودہی نا چندی ڈٹ آتے پورو کننگا، راجہ پرویز اشرف پارے کہ دے ٹک نیامی، افریقہ و یورپ تون رابطہ کاری کن گوادر پورٹ اہم ءِ، پاکستان نا پارلیمان سی پیک ڈٹ آتا زوت پوروی نا بابت است خواہی تخنگ ءِ۔ اوپارے کہ پاکستان نا پارلیمان دا بابت تینا کلیڈی کڑد ءِ ادا کننگ ءِ، خاص وڑاٹ بلوچستان و بالعموم مچ اٹی سی پیک ڈٹ آتا کمک اٹ شونہالی بریک، سی پیک ءِ لتاڑنگ کن پروپیگنڈا تے اسُل سگپنہ۔ اوپارے کہ میڈیا نا ہم زمواری او سی پیک نا بابت جعلی خبرآتے جاگہ تف، ہڑتوم آ ملک آتا میڈیا اسہ ایلو تون خبرآتا تبادلہ ءِ کیر تانکہ سی پیک نا بابت غلط خبر و پروپیگنڈا تا مقابلہ ءِ کننگے۔ اوپارے کہ سی پیک اسہ فلیگ شپ ڈٹ اسے و ساڑی حکومت اودے اولیت آتیٹی اوار کرینے۔
