انقرہ۔2جون (اے پی پی): ،مزن وزیر شہباز شریف ترکی ءِ سئے روچی سرکاری تر ءُ تاب ءِ سرجم کنگ ءَ پد ڈل ءِ ھمبراہی ءَ وطن ءَ واتر روادگ بوتگ۔ پنچ شمبے ءِ روچ ءَ ایسن یوعا ائیر پورٹ ءَ ترکی ءِ وزیر ءِ تجارت ڈاکٹر مہمت موش ءَ مزن وزیر محمد شہباز شریف ءُ پاکستانی ڈل ءَ را بروپہ ھیر کت۔ مزن وزیر محمد شہباز شریف ءَ 31 مئی ءَ بگر تاں 2 جون ءَ تاں ترکی ءِ سئے روچی سرکاری تر ءُ تاب کت۔ وزارت ءِ سیٹ ءَ نندگ ءَ چہ پد مزن وزیر شہباز شریف ءِ ترکی ءِ اے اولی تر ءُ تاب بوتگ۔ مزن وزیر شہباز شریف ءَ تر ءُ تاب ءِ ساھت ءَ صدر درجب طیب اردوان ءَ گوں وَن آن وَن گند ءُ نند کت وھدیکہ دوئیں ملک آنی نیام ءَ ڈلی تک ءَ گپ ءُ تران ھم بوت۔ صدر اردوان ءَ مزن وزیر شہباز شریف ءِ شرپ ءِ ڈنر ءِ دعوت ھم دات۔ دوئیں سروک آں دوئیں ملک آنی نیام ءَ وت مہ وتی تپاکی آنی 6 یاتگیر آنی سر ءَ دست چنگل ءِ مراگش ءِ تہءَ بھر وزری کت۔ دوئیں ملک آنی نیام ءَ سفارتی یکوئی آنی 75 سال سرجم بوھگ ءِ پد ءَ یکجائی لوگو جاڑی کنگ بوت۔ دوئیں ملک آں اے سالروچ سرجم ءُ برجمیں رنگ ءَ برجم دارگ ءِ جزم ءِ درشان کت۔ مزن وزیر شہباز شریف ءُ آئی ءِ ڈل ءِ جوانیں وش اتک ءُ میزبانی ءِ پد ءَ ترک صدر ءِ شگر ءُ منت واری گپت۔ مزن وزیر ءَ صدر طیب اردوان ءَ را پاکستان ءِ تر ءُ تاب ءِ دعوت ھم دات۔ تر ءُ تاب ءِ ساھت ءَ مزن وزیر ءَ ترکی ءِ نامداری کاروباری ءُ جتا جتائیں شوبگ آنی تہ ءَ سرمایہ کاری ءَ جھلانکیں واھگ داروکیں سروک آں گوں گند ءُ نند ھم کت۔ مزن وزیر ءَ پاکستان ترکی نزنس کونسل فورم ءَ گوں گشتانک ھم دات ءُ پاکستان ءَ سرمایہ کاری ءِ موہ آناں سہرا کت۔ مزن وزیر ءَ نوکیں ترکی ءِ جوڑیشتکار کمال اتاترک ءِ مزار ءِ سر ءَ حاضری دات ءُ پُل شانک دات ءُ چادر پر دات۔ مزن وزیر ءَ ترک وزیر ءِ درئی کار، وزیر ءِ جان سلامتی ءُ وزیر ءِ تجارت ءَ گوں گند ءُ نند کت۔
