اسلام آباد۔2جون (اے پی پی): مزن وزیر شہباز شریف ءَ گوں ترکی ءِ وزیر ءِ جان سلامتی ڈاکٹر فرحتین گوجا ءَ پنچ شمبے ءِ روچ ءَ انقرہ ءَ گند ءُ نند کت۔ دو نیمگی کمک آناں ودینگ ءِ ارزشت ءِ سر ءَ زور دیگ بوت۔ مزن وزیر ءَ گوستگیں بیست سال ءَ ترکی ءَ جان سلامتی نظام ءَ را مٹ کنگ ءِ ھوالگ ءَ صدر رجب طیب اردوان ءَ را ساڑات ءُ گوشت کہ ترکی ءِ نیمگ ءَ چہ پاکستان ءَ جان سلامتی ءِ شوبگ ءَ ھاسیں رنگ ءَ جان سلامتی ءِ ازمت، درمان جوڑ کنگ، ڈیجیٹل جان سلامتی ءُ ھیل کاری ءُ طبی پڑ ءَ گوں کار کنوکیں بلدیں مردم آنی تہ ءَ گیشی آرگ ءِ واستہ یکجائی گامگیج آنی زکر کت۔ مزن وزیر محمد شہباز شریف ءَ 2005 ءِ زمین چینڈ ءُ 2010 ءِ سلاپ ءِ ساھت ءَ ترکی ءِ ساپ دلیں کمک ءِ توسیپ کت۔ آئی ءَ گوشت کہ پاکستان ءَ بیم ناکیں سیلاپ ءَ چہ پد مظفر گڑھ ءَ رجب طیب اردوان ہسپتال ءِ جوڑیشت ءَ را ساڑات۔ مزن وزیر ءَ ترکی ءِ نیمگ ءَ چہ کورونا وائرس ءَ گوں گر ءُ چیل بوھگ ءِ و استہ توسیپی گامگیج کنگ ءِ پد ءَ ترکی ءَ را مبارک بات دیان ءَ گوشت کہ دوئیں ملک آناں ھوپی نادُراھی ءَ چہ پیداک بوھوکیں جان سلامتی ءَ معاشی جیڈھ آنی گیش ءُ گیوار ءُ ویکسین ءِ تیاری ءَ کمک تاں باید اِنت کہ کمک جاڑی دارگ بہ بیت۔ مزن وزیر محمد شہباز شریف ءَ جان سلامتی ءِ ھوالگ ءَ ترکی۔ پاکستان جوائنٹ ورکنگ گروپ ءِ دو نیمگی جان سلامتی کمک آنی جتا جتائیں بھر آنی سر ءَ سرجمیں گپ ءُ تران کنگ ءِ گوما پیتھالوجی لیبز ءِ جوڑیشت، پاکستان کڈنی لیورانسٹی ٹیوٹ ءِ گہتریں کار ءُ آٹو موبائل ایمبولینسز ءَ ھوار جتا جتائیں گامگیج آنی پد ءُ رند ءِ ارزشست ءِ سر ءَ زور پر دات۔ ترکی ءِ وزیر ءِ جان سلامتی ءَ طبی ساز ءُ سامان ءُ دوا ءُ درمان ءِ جوڑ کنگ، جان سلامتی سیل ءُ سواد ءُ کوالٹی کنٹرول ءَ ھوار جان سلامتی ءِ شوبگ ءَ جتا جتائیں بھر آنی تہ ءَ کمک آناں ودینگ ءِ امیت آناں سہرا کت۔ آئی ءَ گوشت کہ ترکی ءِ وزارت ءِ جان سلامتی ءِ یک ٹیمب ءِ زوت پاکستان ءِ تر ءُ تاب ءَ کنت۔ ترکی ءِ وزیر ءِ جان سلامتی ءَ گوشت کہ گوزوکیں سال اکتوبر ءَ پاکستان ءَ ”پاک میڈیکا ایکسپو اینڈ بزنس فورم“ ءِ بندوبست کنگ بیت۔ گند ءُ نند ءَ اے گپ ءِ سر ءَ زور پر داست کہ جان سلامتی ءِ یکجائی ورکنگ گروپ ءِ وسیلگ ءَ یکجائیں شوبگ آنی تہ ءَ کمک آناں جاڑی دارگ بیت۔
