انقرہ۔ 01 جون (اے پی پی) وزیراعظم محمد شہباز شریف و ترکی نا صدر رجب طیب اردوان ہڑتوم آ ایلم ملک آتا نیام اٹ گچین ہڑتوم آ کنڈآتا تعلقداری تے چندی بشخ آتیٹی ہڑتوم آ کنڈآتا کمکاری نا پوسکن آ بڑزی تسکان سرکننگ نا تینا عزم انا درشانی ءِ کرسا پارینو کہ ہڑتوم آ ملک آتا نیام اٹ تعلقداری اوسیجائی تاریخ و مسخت آتیا مبنی ءِ و دا تعلقداری نسل درنسل برجاسلک، پاکستان و ترکی نا نیام اٹ خڑکی سنگتی و کمکاری ءِ پین سوگو کننگک، ستمبر اٹی اسلام آباد اٹی بڑزکو کہولی دیوان اس اڈ ہلیک ہراڑآن ہڑتوم آ ملک آتے تینا برادرانہ تعلقداری تے پین مون آ دننگ نا موقع ملک۔ داخیال آتا درشانی ءِ او چارشنبے نادے آ داڑے اوڑدہی آن پد اسیجائی پریس کانفرنس آن تران کرسا کریر۔ وزیراعظم محمد شہباز شریف پارے کہ داسال ہڑتوم آ ملک آک تینا سفارتی تعلقداری تا جوڑ مننگ نا 75 می سال دے ءِ اڈتننگ ءُ۔ وزیراعظم صدر اردوان تون اوڑدہی ءِ بھاز بھرمی گوندسا دااومیت نا درشانی ءِ کرے کہ ترک صدر نا فعال سرکڑدہ ئی ٹی ہڑتوم آ کنڈآتا تعلقداری پوسکن آ بڑزی تسکان سرمریرہ۔ ترکی نا صدر رجب طیب اردوان پارے کہ اوڑدہی ٹی اوعلاقائی و جہانی ویل آتیا سرجم گپ وتران کریر۔ او ہڑتوم آ کنڈآتا تعلقداری نا دنگ ءِ ودفنگ نا ہم درشانی ءِ کریر۔ وزیراعظم شہباز شریف جم و جوش اٹ بخیر وپرخلوص مہمانداری آ ترک صدر نا منتواری ءِ ہرفے و پارے کہ ترکی آ بننگ ننکن تینا ارٹ میکو اُراغانبار ءِ، ای تین تون پاکستانی الس نا کنڈآن ترکی ٹی تینا ایلم و ایڑھ تیکن نیک است خواہی نا کلہو اس اتسا بسونٹ۔ اوپارے کہ پاکستان و ترکی نا نیام اٹ تعلقداری اسیجائی دودوربیدگی مذہبی و روحانی میرات اٹ گنڈوک ءُ ہرا وخت انا حد، جغرافیہ و سیاست آن ایڑتر ءُ، نن دا رشتہ غاتے اسہ مقدس امانت سے نا وڑاٹ ہرنہ ہرا ننا باوہ و پیرہ ننے تسنو و ہرافتے نن تینا بروک آ چین تا دوٹی تننگ کن سنبرینگوک اُن۔ وزیراعظم پارے کہ دا سال نن ہڑتوم آ ملک آک تینا سفارتی تعلقداری تا جوڑ مننگ نا 75 می سال دے ءِ شایان شان وڑاٹ اڈتننگ ءُ۔ کنا ہنین آ ایلم صدر رجب طیب اردوان نا متحرک و بصیرت افروز سرکڑدہ ئی ٹی ننا ہڑتوم آ کنڈآتا تعلقداری پوسکن آ بڑزی تسکان سرمسنے۔ اوپارے کہ ننا ملک آک بڑزکو کہولی اسٹریٹجک کمکار کونسل نا دیوان تیٹی جوان گپ وتران اٹی اختہ ءُ ہرا ننا اسیجائی فائدہ غاتیا مبنی ءُ ، کنے د ا پڑو کرسا بھاز خوشی مننگ ءِ کہ کنا ایلم صدر اردوان بروک آ بڑزکو کہولی دیوان ءِ ستمبر اٹی اسلام آباد اٹی اڈتننگ نا عندیہ تسنے۔ وزیراعظم پارے کہ صدر طیب اردوان نا بھاز منت وار اُٹ کہ او ننے مہمانداری نا موقع اس تس و نن دا بے کچ بھرمی اوڑدہی تا چاری اُن، پاکستانی الس نے جم و جوش اٹ بخیر کیک۔ داہم پک مسنے کہ جون اٹی اسہ سوگو واپاری ڈل اس ہم پاکستان نادورہ ءِ کیک، ننا ٹیم ہموڑے اوڑدہی تیکن جوان تیاری کیک تانکہ نن پبی و بھرمی گام گیج کننگ کین۔ اوپارے کہ ای کامرس ، ٹورازم ، تعلیم و انفراسٹرکچر ڈویلپمنٹ کون آ بھاز انگا بشخ آک ءُ ہراڑے ترکی بھلو شونداری اس کرینے، پن بجلی نا پیدوار و قابل تجدید توانائی نا بشخ اٹی ننے ترکی آن زرکاری نا دروشم اٹ کمکاری دوئی کننگ آ بھاز خوشی مریک، ننا ترک ایلم زرکاری آن کٹیا کیک و ننے اڑزآن توانائی ملک ہراکہ اسہ بھاز بھلو سرسہبی اس مریک۔ اوہڑتوم آملک آتا نیام اٹ دفاعی صنعت نا بشخ اٹی کمکاری نا گمان تے ہم تالان کرے۔ ترکی نا صدر رجب طیب اردوان گپ وتران کرسا پارے کہ پاکستان و ترکی نا نیام اٹ بھاز خڑکی دوستانہ تعلقداری ءِ ، ہڑتوم آ ملک آک ہڑتوم آکنڈآتا تعلقداری تے پین مون آ دننگ کن سنبرینگوک ءُ۔ اوپارے کہ الس نا شونہالی کن پاکستان تون اقتصادی کمکاری اولیت ءِ، ہڑتوم آ ملک آتا نیام اٹ مواصلات ، تعلیم، چاگڑد و انفراسٹرکچر نا بشخ آتیٹی خڑکی کمکاری ءِ، پاکستان ءِ بحری جہاز آتا تیاری ٹی ہرممکن کمک فراوان کننگ اُن۔ ترک صدر پارے کہ دہشت گردی نا برخلاف پاکستان نا غٹ کوشست آتا مخ تفی ءِ کینہ، جہانی فورم تیا پاکستان نا پبی مخ تفی آ منت وار اُن، چندی جہانی فورم تیا اہم جہانی و علاقائی امور آ پاکستان و ترکی اسہ وڑموقف تخرہ۔ اوپارے کہ نن کشمیری ایم و ایڑھ تا روا است خواہی و اقوام متحدہ نا قرارداد آتا رداٹ کشمیر نا ویل انا ایسری نا مخ تفی ءِ کینہ۔ اوپارے کہ پرامن و شونہال اوغانستان ڈیہہ نا فائدہ ٹی ءِ، انسانی ہمدردی نا بنداو آ اوغان الس ءِ پبی کمک فراوان کننگا۔ ترک صدر پارے کہ ننا گپ وتران بھرمی پک مریک، ای تینا ہنین آ ایلم محمد شہباز شریف و اونا ڈل انا ترکی نا دورہ ءِ کننگ آ منت واری ءِ ہرفیوہ و تینا پاکستانی ایلم و ایڑھ تیکن نیک است خواہی نا کلہو اس ایتیوہ۔ پریس کانفرنس نا ایسر آ ہڑتوم آ راہشونک گرم جوشی اٹ جوڑ بڑکریر۔ داکان مست ہڑتوم آ راہشونک تین پہ تینی فائدہ غاتا چندی بشخ آتیٹی کمکاری ءِ ودفنگ کن چندی معاہدہ و مفاہمت نا یات داشت آتیا دستخط مرسا ہم ہرار۔
