وزیراعظم شہباز شریف تون ترک وزیر خارجہ نا اوڑدہی، ترک کمپنی تے پاکستان اٹ آسراتی فراوان کننگ نا سلہ

اسلام آباد۔ 01 جون (اے پی پی) وزیراعظم محمد شہباز شریف تون ترکی نا وزیر خارجہ میولود چاؤش اولو چارشنبے نادے آ انقرہ ٹی اوڑدہی کرے۔ وزیراعظم آفس نا کنڈآن جاری بیان نا رداٹ وزیراعظم ترک وزیرخارجہ تون گپ وتران کرسا بروک آ مسہ سال اٹی پاکستان و ترکی نا ہڑتوم آ کنڈآتا واپاری کچ ءِ 5 ارب ڈالر اسکان ودفنگ نا اہمیت آ زور شاغا۔ اوپارے کہ ترک کمپنی تے پاکستان اٹ پورو آسراتی فراوان کننگک، اوترکی نا کمپنی تے فوڈ پروسیسنگ ، کشت وکشار، آٹو موٹو ، آئی ٹی ، پن بجلی، سولر و ونڈانرجی تون اوار چندی بشخ آتیٹی زرکاری کننگ نا سلہ خلک۔ وزیراعظم محمد شہباز شریف پارے کہ پاکستان و ترکی نا ہڑتوم آ کنڈآتا تعلقداری ٹی گرم جوشی مسنے انتئے کہ ہڑتوم آ ملک آتا الس نا نیام اٹ پیڑی تیا متکن خصوصی رشتہ اس جوڑ ءِ ، وزیراعظم ہڑتوم آ ملک آتا کنڈآن گرج انا وخت اسہ ایلو نا کمک نا ذکر ءِ کرے۔ وزیراعظم ترک وزیر خارجہ نا پاکستان و ترکی نا ہڑتوم آ کنڈآتا تعلقداری تے مون آدننگ و ہڑتوم آ ملک آتا نیام اٹ کمکاری نا ساڑی ادارہ جاتی میکانزم ءِ سوگو کننگ اٹ ہم کڑد انا ستاءِ کرے۔ اوڑدہی ٹی دا رداٹ بڑزکو کہول انا سٹریٹجک کوآپریشن کونسل نا ہفت می دیوان نا اہمیت و اونا پبی تیاری تا جاچءِ ہلنگا۔ وزیراعظم بروک آ مسہ سال اٹی ہڑتوم آکنڈآتا واپاری کچ ءِ 5 ارب ڈالر اسکان ودفنگ نا اہمیت آ زور شاغا۔ اوترکی نا کمپنی تے پاکستان اٹ پورو آسراتی فراوان کننگ نا عزم انا درشانی ءِ کرسا اوفتے فوڈ پروسیسنگ ، کشت وکشار ، آٹو موٹو، آئی ٹی، پن بجلی، سولر و ونڈانرجی تو ن اوار چندی بشخ آتیٹی زرکاری کننگ نا سلہ خلک۔ وزیراعظم بنداوی است خواہی نا امور آ ہڑتوم آ ملک آتا اسہ ایلو کن آخبت مخ تفی نا ذکر ءِ کرسا جموں وکشمیر ناجھیڑہ غا ترکی نا اصولی پالیسی آ ترک وزیر خارجہ نا منت واری ءِ ہرفے۔ اوپاکستان و کشمیری الس نا انصاف اٹ  مسخت کن ترکی نا مخ تفی نا ستاءِ کرسا اوغانستان نابارواٹ سنگین انسانی حالیت آتون مون تننگ، زرگزران نا سوگوی ٹی کمک کن منجمد اوغان میرات آتا بحالی و ملک اٹی پائیدار امن و سوگوی کن کوشست آتے برجاتخنگ نا اہمیت آ زور شاغا۔ وزیراعظم محمد شہباز شریف چندی علاقائی و جہانی ویل آتیا ہڑتوم آ ملک آتا نیام اٹ ہم آہنگی ءِ پین تالان کرے و خڑکی رابطہ کاری ءِ برجاتخنگ نا گرج آ زور شاغا۔ وزیراعظم شہباز شریف دادے تیٹی ترکی نا مسہ دے ئی سرکاری دورہ غاٹی ءِ۔