پاکستان اٹی توانائی نا بشخ اٹی ترک زرکارآتیکن گچین وارخواہی ساڑی ءِ، وزیراعظم نا ترکی پاکستان بزنسل کونسل آن تران

انقرہ۔ 01 جون (اے پی پی) وزیراعظم شہباز شریف ترک زرکار آتے پاکستان اٹی توانائی تون اوار چندی بشخ آتیٹی زرکاری نا وارخواہی تیان پبی فائدہ ہرفنگ نا سلہ خلکونے۔ چارشنبے نادے آ ڈی ای آئی کے۔ فارن اکنامک ریلیشنز بورڈ انا رداٹ ترکی پاکستان بزنس کونسل آن تران کرسا وزیراعظم پارے کہ پاکستان اٹی ہائیڈل ، تھرمل، کول، ونڈ و سولر تون اوار توانائی نا بشخ ٹی ترک زرکارآتیکن زرکاری نا گچین وارخواہی ساڑی ءِ۔ وزیراعظم پارے کہ بھاز انگا پنی ترک زرکار آک مہالو آن پاکستان اٹی زرکاری کرینو۔ اوباور کرفے کہ حکومت اوفتے تون ڈٹ آتا چرجوئی ٹی ہرممکن کمک فراوان کیک۔ وزیراعظم پارے کہ جہانی کہول آ توانائی نا ودوک آ نہاد و پاکستان اٹی توانائی نا ودوک آ گرج آتا رداٹ پاکستان ءِ توانائی نا بشخ اٹی گچینی اتنگ نا سخت گرج ءِ ، توانائی نا بشخ اٹی زرکاری آن ترک زرکار و پاکستان ہڑتوم آتے فائدہ مریک۔ اوپارے کہ پاکستان آبی کوڑی و ڈیم تا تفنگ کن ترکی نا مہارت آتیان فائدہ ہرفنگ کیک، پاکستان اٹی اقتصادی و زرکاری نا وارخواہی تے تالان کرسا وزیراعظم خاص وڑاٹ توانائی، ہاؤسنگ، ٹیکسٹائل، انفراسٹرکچر نا شونداری، تیل و گیس و کشت وکشار آ مبنی صنعت نا خاص وڑاٹ ذکر ءِ کرے۔ وزیراعظم پارے کہ پاکستان و ترکی نا نیام اٹ تعلقداری مہرومریبت ، اخوت، تین پہ تینی شرف نا بنداو آ ٹے و ہڑتوم آ ملک آک تاریخ، پیڑی تیا متکن روایت و اسیجائی است خواہی تا خواجہ ءُ۔ اوپارے کہ ہڑتوم آ قومک ہروڑنا حالیت آتیٹی اسہ ایلو تون تفینو واوفتا تعلقداری بھاز دوستانہ و بھلا تین پہ تینی پت آ مبنی مسنے۔ وزیراعظم پارے کہ پاکستان و ترکی نا ٹیکسٹائل کمپنی پاکستان اٹی خاص وڑاٹ بین الصنعت واپار و اسیجائی ڈٹ آتیٹی زرکاری کننگ کیرہ و علاقائی و جہانی کہول انا ویلیو چین آتیٹی شریدار مننگ کیرہ۔ اوترک کمپنی تے پاکستان اٹی کشت وکشار آ مبنی صنعتی بشخ و ڈیری فارمنگ اٹ زرکاری نا سلہ ہم خلک و پارے کہ دا بشخ آتیٹی بھلو وارخواہی اس ساڑی ءِ۔ وزیراعظم پارے کہ پاکستان و ترک کمپنی تیل و گیس انا بشخ آتیٹی ہم اواری اٹ کاریم کننگ کیرہ و نئے بیرہ تیل و گیس انا پٹنگ و پیدوار بلکن ریفائنریز نا تفنگ و پائپ لائن تالان کننگ اٹ ہم شریداری کننگ کیرہ۔ وزیراعظم تینا حکومت نا اولیت آتے تالان کرسا پارے کہ چارمیکو جہانی صنعتی انقلاب نا رداٹ خاص وڑاٹ صنعتی پائیداری نا چیلنج آتون مون تننگ اہمیت تخک۔ اوپارے کہ پاکستان نا بھاز بھلو آبادی اس ورناتیا تالان ءِ ہرا ملک انا شونداری ٹی بھاز اہم ءُ کڑد اس ادا کننگ کیرہ۔