وزیراعظم شہباز شریف تون ترک وزیرخارجہ نا اوڑدہی، ہڑتوم آ کنڈآتا تعلقداری تا مون آ دننگ آ گپ وتران

انقرہ۔ 01 جون (اے پی پی) وزیراعظم شہباز شریف تون ترک وزیر خارجہ میولود چاؤش اولو اینو (چارشنبے نادے آ) اوڑدہی کرے۔ اوڑدہی ٹی ہڑتوم آ کنڈآتا تعلقداری نا پین مون آ دننگ آ گپ وتران مس۔ اوڑدہی ٹی پاکستان و ترکی نا بڑزکو سرکڑدہ غاک ساڑی ئسر۔ وزیراعظم آفس نا میڈیا ونگ آن جاری بیان نا رداٹ وزیراعظم اینو(چارشنبے نادے آ) اوکان پد ترک صدر رجب طیب اردوان تون اوڑدہی کیک۔ وزیراعظم ءِ صدارتی ماڑی ٹی ترک صدر رجب طیب اردوان تون اوڑدہی کن ترک روایت آتا رداٹ جانثاری دستہ نا حصار اٹ دننگک۔ وزیراعظم نا گارڈ آف آنر اٹ شاندار بیابخیری ءِ کننگک۔ وزیراعظم پاکستان و ترک صدر نا اوڑدہی آن پد ڈل آتا کہول انا اوڑدہی مریک اوکان پد ہڑتوم آ راہشون میڈیا تون گپ وتران کیرہ۔ وزیراعظم شہباز شریف ہرا ترکی نا مسہ دے ئی دورہ غاٹی ءِ، وزیراعظم شہباز شریف مصطفیٰ کمال اتاترک نا مزار آ حاضری ہم ایتک۔ داکان مست تدوک آ نن وزیراعظم ترکی نا یونین آف چیمبرز اینڈ کموڈٹی ایکسچینجز (ٹی او بی بی ) نا کنڈآن دود اٹی بشخ ہلک۔ داوخت آ تینا تران اٹی وزیراعظم شہباز شریف پارے کہ او پاکستان و ترکی نا نیام اٹ واپاری و اقتصادی شریداری ءِ ودفنگ نا خواہندار ءِ، ہڑتوم آ ملک آتا کاروباری برادری بروک آ مسہ سال اٹی واپار اٹی 5 ارب ڈالر آن زیات نا ودکی نا ہدف مقرر کیر، داہدف نا دوئی کننگ کن حکومت ہر المی گام گیج کیک۔ وزیراعظم نا ستاءِ کرسا یونین آف چیمبرز نا صدر رفعت حسارسک لیوگلو ترکی نا زرکار و کاروبار شخصیت آتا کنڈآن پاکستان تون اقتصادی و واپاری کمکاری ءِ سوگو کننگ و زرکاری کننگ اٹ بھاز است خواہی نا درشانی ءِ کرے۔ وزیراعظم تینا تران اٹی پاکستان و ترکی نا نیام اٹ خڑکی برادرانہ تعلقداری و مشکل وخت اٹی ہڑتوم آ قوم تا اسہ ایلو تون تفنگ نا تابندہ روایت آتے تالان کرے۔ وزیراعظم ترک صدر رجب طیب اردوان نا زبردست سرکڑدہ ئی ٹی ترکی نا بھلا شونداری نا ستاءِ کرے۔ اوپاکستان وترکی نا تعلقداری تے چندی بشخ آتیٹی پوسکن آ بڑزی تسکان دننگ نا عزم انا درشانی ءِ کرے۔ اوپارے کہ اونا دورہ نا مسخت ہڑتوم آ ملک آتا نیام اٹ خاص وڑاٹ واپاری و اقتصادی رابطہ غاتے پین سوگو کننگ ءِ۔ ہڑتوم آ ملک آتا نیام اٹ ہڑتوم آ کنڈآتا واپاری و اقتصادی تعلقداری تا کسر اٹ بروک اڑاند آتے مر کننگ نا گرج آ زور شاغسا وزیراعظم ترکی نا زرکارآتے آسراتی فراوان کننگ نا تینا حکومت نا عزم انا درشانی ءِ کرے۔ اودا چرجوئی ٹی خاص وڑاٹ پاکستان اٹ ترکی کمپنی تے مون تروک ویل آتا دمدستی ایسر نا باور کرفے۔ ہڑتوم آ ملک آتا نیام اٹ ہڑتوم آ کنڈآتا تعلقداری آن فائدہ ہرفسا واپار و اقتصادی شریداری ءِ ودفنگ کن وزیراعظم ہڑتوم آ ملک آتا کاروباری برادری آ زور شاغا کہ بروک آ مسہ سال اٹی واپار اٹی 5 ارب ڈالر آن زیات نا ودکی نا ہدف مقرر کیر۔ اوکاروباری برادری ءِ باور کرفے کہ اونا حکومت داہدف نادوئی کننگ کن ہرممکن گام گیج کیک۔ داوخت آ ترک کمپنی تا نمائندہ غاک پاکستان اٹی زرکاری کن تینا ڈٹ آتا ذکر ءِ کریر و پاکستان نا کاروباری ڈل اتون گپ وتران کریر۔