وزیراعظم شہباز شریف نا پاکستان ترکی بزنس کونسل آن تران ، ترک زرکار آتے پاکستان اٹی زرکاری نا سلہ

انقرہ۔ 01 جون (اے پی پی) وزیراعظم شہباز شریف پارینے کہ پاکستان و ترکی نا نیام اٹ واپاری تعلقداری تے مون آ دننگ نا بھلو وارخواہی اس ساڑی ءِ، ترک زرکار آک داڑآن فائدہ ہرفر، حکومت ہرممکن آسراتی فراوان کیک، شونہال راج انا جوڑ کننگ کن افکار تازہ و پوسکن آ مہارت آتے کاریم اٹ اتنگ نا گرج ءِ۔ چارشنبے نادے آ داڑے پاکستان ترکی بزنسل کونسل نا دود آن تران کرسا وزیراعظم پارے کہ پاکستان و ترکی نا نیام اٹ متکن ءُ رشتہ اس جوڑ ءِ و ہڑتوم آ ملک سنگتی نا سوگو بندھن اٹ تفوک ءُ، ہڑتوم آ ملک آتا زبان جتا ولے دودوربیدگ اسٹ ءِ، پاکستان وترکی ہر مشکل وخت اٹی اسہ ایلو تون تفینو، ترک الس زمی جمب، نوکاپ و ایلو قدرتی آفت آتیٹی پاکستان تون بھاز کمک کریر۔ اوپارے کہ مچ آ دنیا ءِ کورونا نا دین و روس یوکرین جنگ انا سوب آن زرگزرانی مشکل آتا مون تروک ءِ۔ وزیراعظم پارے کہ تدوک آ نن ترک پوریاگر آتون سرجم گپ وتران مس۔ ہڑتوم آ ملک آتا نیام اٹ واپار و السی رابطہ ءِ ودفنگ نا وارخواہی ساڑی ءِ۔ اوترک پوریاگر و زرکارآتے پاکستان اٹ زرکاری نا سلہ خلسا پارے کہ ترک زرکارآتا پاکستان اٹ زرکاری ءِ قدر انا نظر اٹ ہرنہ۔ اوپارے کہ ہڑتوم آ ملک آتا نیام اٹ واپاری تعلقداری تے مون آ دننگ نا بھلو وارخواہی اس ساڑی ءِ۔ اوہڑتوم آ ملک آتا کارسازی و ٹیکسٹائل انڈسٹری نا بشخ اٹی کمکاری نا وارخواہی ساڑی ءِ، پاکستان اٹی ڈیم تا بشخ اٹی بھاز زرکاری مننگ ءِ۔ وزیراعظم پارے کہ پن بجلی آن 40 ہزار میگاواٹ بجلی ودی کننگ نا گنجائشت ساڑی ءِ ، ترک زرکارآک داڑآن فائدہ ہرفر۔ وزیراعظم پوسکن و شونہال راج اسے نا جوڑ کننگ کن جدت و افکار تازہ نا اہمیت ءِ تالان کرسا پارے کہ ہموقومک شون ہلیرہ ہرا پوسکن آ سوچ و پوسکن آ مہارت آتے کاریم اٹ اتیرہ۔ اوپارے کہ پاکستان نا شست درسد آبادی ورناتیا تالان ءِ ، اوفتے اگہ پوسکن آ مہارت و ٹیکنالوجی تیان شپ کننگے تو او سرکڑدہ ئی کننگ کیرہ۔ اوپارے کہ آئی ٹی نا بشخ اٹی ہم بھلو وارخواہی اس ساڑی ءِ۔ وزیراعظم ترک کمپنی تے پاکستانی کمپنی تتون اسیجائی ڈٹ آتا سلاہ ہم تس و باور کرفے کہ حکومت زرکاری و کاروبارنا کسر اٹ بروک غٹ اڑاند آتے مر کیک و ہرممکن آسراتی فراوان کیک۔ داوخت آ وزیرخارجہ بلاول بھٹو زرداری، بنجائی وزیر حوالکاری و شینکاری مریم اورنگزیب ، وزیر واپار سید نوید قمر و چوہدری سالک حسین تون اوار پاکستانی ڈل انا ایلو باسک آک ہم ساڑی ئسر