اسلام آباد۔ 01 جون (اے پی پی) وزیرخارجہ بلاول بھٹو زرداری جہانی برادری و عبوری اوغان حکومت نا نیام اٹ پدریسہ رابطہ نا گرج آ زور شاغسا جموں و کشمیر نا جھیڑہ غا ترک حکومت نا ثابت قدم مخ تفی و اصولی موقف آ ترکی نا منت واری ءِ ہرفینے۔ داخیال آتا درشانی ءِ او ترکی نا دورہ نا وخت آ انقرہ ٹی ترک وزیر خارجہ میولود چاؤش اولوتون اوڑدہی ٹی گپ وتران کرسا کرے ۔ دفترخارجہ نا ترجمان نا کنڈآن جاری بیان نا رداٹ ترکی نا دورہ نا وخت آ وزیر خارجہ بلاول بھٹو زرداری و ترک وزیر خارجہ میولود چاؤش اولونا نیام اٹ ہڑتوم آ ملک آتا تعلقداری نا مون آ دننگ آ گپ وتران مس۔ وزیرخارجہ بلاول بھٹو زرداری گرم جوشی اٹ مہمانداری آ تینا ترک ہم منصب نا منت واری ءِ ہرفسا پارے کہ ہڑتوم آ کنڈآتا تعلقداری پیار و مہرومریبت آ ٹی ءِ ہرا ہڑتوم آ ملک آتا نیام اٹ الس اسہ ایلو کن تخرہ۔ ہڑتوم آ وزیر خارجہ غاک چندی سرحال آتیا گپ وتران کریر و چندی بشخ آتیٹی برجاکمکاری نا جاچ ءِ ہلکر۔ وزیرخارجہ دا ہیت آ زور شاغا کہ بڑزکو کہول انا سٹریٹجک کوآپریشن کونسل و سٹریٹجک اکنامک فریم ورک ہڑتوم آ کنڈآتا تعلقداری تے پین بڑزی اسکان دننگ کن جوان وڑوڈول نا وڑاٹ کاریم کرسا کرینے۔ اوپارے کہ پاکستان اینخو سال انا ایسر اٹ ترکی نا بڑزکو کہول انا سٹریٹجک کوآپریشن کونسل نا دیوان نا چاری ءِ۔ ہڑتوم آ وزیر خارجہ غاک علاقائی امور آ ہم گپ وتران کریر۔ وزیرخارجہ تینا خڑکی ہمسایہ و اوکان پیشن امن و سلامتی کن ترکی نا کمکاری نا ستاءِ کرے۔ اوغانستان نا بارواٹی وزیرخارجہ اوغانستان اٹی امن، سوگوی و شونداری نا اسیجائی مسخت آتا دوئی کننگ کن جہانی برادری و عبوری اوغان حکومت نا نیام اٹ پدریسہ رابطہ نا گرج آ زور شاغا۔ بلاول بھٹو زرداری یوکرین نا تنکی ٹی ترکی نا تعمیری کڑد و گپ وتران و سفارت کاری ءِ مون آ دننگ اٹ ترک وزیر خارجہ نا ذاتی کوشست آتا ہم ستاءِ کرے۔ داہیت ذکر انا قابل ءِ کہ وزیرخارجہ بلاول بھٹو زرداری ترکی نا سرکاری دورہ غا وزیراعظم تون اوار ءِ۔ اسہ تُو آن وخت اٹی ہڑتوم آ وزیر خارجہ غاتا دا ارٹ میکو اوڑدہی ئسک۔ وزیرخارجہ بلاول بھٹو زرداری نا شرف اٹی ترکی نا وزیر خارجہ میولود چاؤش اولو تدوک آ نن سُوارہ اس ہم تس۔
