اسلام آباد۔ 01 جون (اے پی پی) وزارت داخلہ اسلام آباد پولیس و فرنٹیئر کانسٹیبلری نا تنخواہ ، الاؤنس و شہداء پیکج ءِ پنجاب و خیبرپختونخوا نا بریبر کننگ و اسلام آباد اٹی ڈوہ انا توننگ کن کیمرہ غاتا کوریج 100 درس کننگ نا فیصلہ کرینن وخت اس کہ وزیرداخلہ رانا ثناء اللہ پارے کہ پھساتی مارچ ءِ اسُل اسلام آباد اٹی پترینگ انگ نا موکل تفنگک و شرپسند زموار و کانود ءِ دوٹی ہلوک آتون سختی اٹ مون تننگک۔ وزارت داخلہ نا کنڈآن چارشنبے نادے آجاری بیان نا رداٹ وزیر داخلہ رانا ثناء اللہ نا کماشی ٹی اسلام آباد پولیس و فرنٹیئر کانسٹیبلری نا آپریشنل کاریم نا کچءِ ودفنگ نا بابت دیوان اس اڈ ہلک ہراٹی بنجائی سیکرٹری داخلہ یوسف نسیم کھوکھر آن بیدس کمانڈنٹ فرنٹیئر کانسٹیبلری صلاح الدین محسود ، آئی جی پولیس اسلام آباد ڈاکٹر اکبر ناصر، چیف کمشنر اسلام آباد عامر احمد علی و ایلو بڑزکو کمامدارآک بشخ ہلکر۔ دیوان اٹی امن و ایمنی کن اسلام آباد پولیس و فرنٹیئر کانسٹیبلری ءِ پین مالی ، تکنیکی وسیلہ و لیگل سپورٹ فراوان کننگ نا فیصلہ کننگا۔ دیوان اٹی اسلام آباد پولیس نا تنخواہ و الاؤنس آتے پنجاب پولیس نا بریبر کننگ نا ہم فیصلہ کننگا۔ داکان بیدس اسلام آباد پولیس نا شہداء پیکج نا اسہ ارب نا بقایہ غاتے دمدستی ادا کننگ، فرنٹیئر کانسٹیبلری نا تنخواہ ، الاؤنس و شہداء پیکج ءِ خیبرپختونخواپولیس نا بریبر کننگ و فرنٹیئر کانسٹیبلری ءِ پولیس ناکمکاری کن بطور اینٹی ریاٹ فورس کاریم اٹ اتنگ و دا چرجوئی ٹی فرنٹیئر کانسٹیبلری ءِ المی تربیت تننگ نا ہم فیصلہ کننگا۔ دیوان اٹی دافیصلہ ہم کننگا کہ بنجائی دارالحکومت نا فول پروف سیکورٹی کن لاہور نا وڑآ اسلام آباد سیف سٹی ءِ پوسکن جوڑ کننگک و امن و ایمنی ءِ پک کننگ و سٹریٹ کرائم نا چٹفنگ کن کیمرہ غاتا کوریج ءِ سد درسد کننگک۔ دیوان اٹی راولپنڈی اسلام آباد نا پولیس و انتظامیہ نا نیام اٹ کوآرڈنیشن میکنزم اس جوڑ کننگ نا ہم فیصلہ کننگا۔ وزیرداخلہ رانا ثناء اللہ دیوان آن تران کرسا پارے کہ ملک ءِ پھساتی جتھ و شرپسند زموار آتا رحم و کرم آ اِلنگ مفک۔ اوپارے کہ بنجائی دارالحکومت اسلام آباد اٹی پھساتی مارچ ءِ ہچ ءُ دروشم اسے ٹی پترینگ انگ کن ہلیپک۔ پھساتی مارچ و شرپسند زموار آتے سختی اٹ لتاڑنگک و کانود ءِ دوٹی ہلوک آتون سختی اٹ مون تننگک۔ اوپارے کہ تدوک آ دے کابنجائی کابینہ پھساتی مارچ انا شرپسند آتا پولیس، رینجر و ایف سی کارندہ غاتیا بیدادی و جلہو آتا ترند انگا لوز آتیٹی مذمت ءِ کرے و پھساتی مارچ اتون گچین کسبی وڑاٹ مون تننگ و امن و ایمنی ءِ پک کننگ کن پولیس، رینجر وایف سی ءِ زبردست خراج تحسین پیش کرے۔ اوپارے کہ اسلام آباد پولیس و ایف سی نا تنخواہ، الاؤنس و شہداء پیکج ءِ بروک آ مالی سال آن پنجاب وکے پی کے نا بریبر کننگک۔
