اسلام آباد۔ 01جون (اے پی پی) بنجائی وزیر ڈٹ بندی و شونداری اصلاحات و خصوصی گام گیج احسن اقبال پارینے کہ ملک اٹی جمہوریت ءِ سوگو کرسا زرگزرانی شونداری نا دوئی کننگ ممکن ءِ سیاسی سوگوی نا کمک اٹ دنیا نا چندی ملک آک شونداری نا مزل آتے طے کریر، سیاسی سوگوی و پالیسی تا چرجوئی آن بیدس زرگزرانی شونداری مننگ کپک، ملک اٹی آئین نا حکمرانی و کانود نا بالادستی ءِ پک کننگ نا ءِ۔ داخیال آتا درشانی ءِ او چارشنبے نادے آ راستہ کانفرنس آن تران کرسا کرے۔ راستہ کانفرنس اٹی ورناک تینا ریسرچ پیپر آتے پیش کیرہ۔ بنجائی وزیر پارے کہ پاکستان داسال تینا 75 می سال دےءِ اڈتننگ ءِ، ہروئی تمک کہ 1988 آن آئینی حکمرانی نا لحاظ اٹ، ججمہوری لحاظ اٹ ملک سوگو مسنے، نزور مس یا ہموڑے سلوک ءِ۔ اوپارے کہ افریقہ و ایلو دنیا نا چندی ملک ننے آن مون آ ہنانو، 1960 اٹی ننا برآمد200 بلین ڈالر و اینو 25 ارب ڈالر ءُ وخت اس کہ سویلی کوریا نا برآمد 100 ملین آن ودسا 500 آن 600 ارب ڈالر مسنے، سیاسی سوگوی و پالیسی تا چرجوئی آن بیدس زرگزرانی شونداری ممکن اف۔ اوپارے کہ پاکستان نا ورناک دا ہیت آ امنا کیر کہ آئین نا بالادستی المی ءِ، پاکستان نا ویل سیاسی نظام اف ، بلکن ویل آئین نا حرمت ءِ امنا کپننگ ءِ، اگہ ریاست اسے بنداوی نظام مفک تو بے چیٹی مریک۔ اوپارے کہ فیک نیوز نا کمک اٹ راج اٹ داخہ دروغ تالان کننگے کہ اعتبار چٹک۔ ننے پائیدار و جوان بنداوی تیا جوان ءُ نظام اسے نا گرج ءِ، دنیا نا ملک آک اسہ نظام اسے تینا کرسا و پالیسی تا چرجوئی آن شون ہلکر۔ اوپارے کہ ہراتم اسہ ملک اس ہم پاکستان اٹ اسہ پیسہ اس خلنگ کن تیار الوکہ چین سی پیک اٹ ارب آ ڈالر نا زرکاری کرے، تدوک آ دور حکومت نا چار سال اٹی سی پیک نا رداٹ ہچ ءُ زرکاری اس متنے، پاکستان نا چار سٹریٹجک پارٹنر ، چین، یورپ ، امریکہ و خلیجی ریاست آک ءُ، اگہ شون ہلوئی ءِ تو امریکی یونیورسٹی تیٹی پاکستانی ورناتے بڑزکو تعلیم ترفوئی ءِ۔ اوپارے کہ ننا ویل آک زیات وخت اس کہ وسیلہ غاک کم ءُ، 1947آنبار ریسرچرو پولکار آتے سجفوئی مریک کہ امر مون آ ہنوئی ءِ، اینخو سال انا پی ایس ڈی پی 900 ارب روپئی ئسک ہرا اپریل اسکان کم مرسا 500 ارب سلیس، چارمیکو سہ ماہی کن فنانس ڈویژن تون جاری کننگ کن شونداری فنڈ اف۔ اوپارے کہ شونداری کن پٹ وپول نا پڑاٹ پین مون آ ہنوئی مریک، حکومت نا شونداری گرج آتیا بایدے پٹ وپول مرے۔ پائیڈ ءِ اوڑآ جاست وپاس کروئی مرے کہ سی پیک آن ہراوڑ فائدہ ہرفنگ مریک، نن یورپ و خلیجی ملک آتا مارکیٹ آ تو چکار کرینن ولے چین نا مارکیٹ آتیا چکار کتون۔
