کابل۔ 01 جون (اے پی پی) اوغانستان کن پاکستان نا سفیر منصور احمد خان پارینے کہ گیس پیپ لین ڈٹ تاپی ٹی اوارملک آک دا ڈٹ ءِ مون آ ہنسا ہُننگ خوارہ۔ اوغان میڈیا نا رداٹ اوتینا اسہ بیان اسے ٹی پارے کہ تاپی گیس ڈٹ ءِ مون تروک سیکورٹی چیلنج آتے مر کننگانے، وداوخت دا ڈٹ ءِ پورو کننگ نا ءِ۔ ولے اوپارے کہ دا ڈٹ اکن بینک آتا کمک اٹ لین دین نا کمتی ءِ اسہ اہم ءُ چیلنج اس گوندا ولے اوکان پد ہم پاکستان دا ڈٹ انا مخ تفی ءِ کرینے۔ اوپارے کہ تاپی ڈٹ اٹ اوار غٹ ملک آک خوارہ کہ دا ڈٹ زوت مون آ کائے انتئے کہ دا نیامی ایشیا غان سویلی ایشیا اسکان توانائی نا سپلائی کن اہم ڈٹ اس مریک۔ اوپارے کہ اونا خیال اٹ تدوک آ منہ تُو آن مذاکرات برجاءِ۔ مستین اٹ دا ڈٹ ءِ مون تروک اہم چیلنج سیکورٹی ئسک ہرادے مر کننگانے وخت اس کہ ساڑی حالیت آتیٹی اہم چیلنج بینکنگ لین دین نا کمتی نا ءِ۔ ایلو کنڈآ اوغانستان نا اقتصادی وزیر عبدالطیف نظاری پارے کہ تاپی ڈٹ خاص سیاسی اڑاند آتا سوب اف بلکن تکنیکی ویل آتا سوب آن تخوک آ وخت آ بناکننگتو ہرادے زوت ایسر کننگک۔ اوغان حکومت نا نائب ترجمان انعام اللہ سمنگانی پارے کہ تاپی ڈٹ آ کاریم نا بناءِ کننگانے۔ تاپی گیس ڈٹ ترکمانستان ، اوغانستان ، پاکستان و بھارت (تاپی) آ تالان ءِ ہرانا رداٹ 1800 کلومیٹر نا گیس پیپ لین ترکمانستان آن مرسا اوغانستان، پاکستان و بھارت اسکان تالان کننگک و 33 ارب مکعب میٹر گیس برآمد کننگک۔
