کوئٹہ۔ 01 جون (اے پی پی) جمعیت علماء اسلام بلوچستان نا صوبائی امیر و بنجائی وزیر ہاؤسنگ اینڈ ورکس مولانا عبدالواسع پارینے کہ ساڑی بنجائی حکومت تینا مد ءِ پورو کیک و پوسکن آ بنجائی بجٹ اٹ الس ءِ ریلیف فراوان کینہ بنجائی حکومت اٹ اوار جماعت آک ملک و صوبہ غاتا شونداری ءِ خوارہ۔ داخیال آتا درشانی ءِ او پارٹی نا سینئر عہدیدار آتون گپ وتران کرسا کرے۔ مولانا عبدالواسع پارے کہ لانگ مارچ اٹی فورس بنجائی حکومت آ جلہو گیر مننگ نا ڈٹ اتون اوار عمران خان نا غٹ عزم آتے بے سہب کرے، داسہ او اسہ وار ولدا اسہ ادارہ سے نا سیبو ءِ ہلسا بنجائی حکومت آ جلہو گیر مننگ نا کوشست کننگ ءِ ہرانا نن موکل تفنہ وخت و حالیت آتا خواست ءِ کہ داسہ عمران نیازی ہراکہ ملک دشمن کڑد ادا کننگ ءِ نا غٹ تر عزم آتے بے سہب کرسا اونا برخلاف غداری و بغاوت نا مقدمہ ءِ درج کرسا اودے دمدستی وڑاٹ پشاور آن اتسا اڈیالہ جیل آ گدریفنگے۔ اوپارے کہ جمعیت علما اسلام شونداری و شونہالی نا روشنائی ناوڑاٹ میدان اٹ تینا تاریخی کڑد ادا کیک، ساڑی آ بلدیاتی گچین کاری تیٹی غٹ تر پروپیگنڈا تیان پد ہم جمعیت علما اسلام سرسہبی دوئی کرے وخت اس کہ مستین اٹ داجاگہ نا الس نا پن آ بھاز انگا واکدارآک جندی ٹولی فائدہ غاتا پن آ ہرا قول آتے کریر او اینو غٹ غلط پک مسر۔
