اسلام آباد۔ 01 جون (اے پی پی) الیکشن کمیشن نا پنجاب و خیبرپختونخوا نا پوسکن آ باسک آک سوغند ہرفیر۔ چارشنبے نادے آ الیکشن کمیشن اٹی سوغندی دود اس اڈ ہلک۔ چیف الیکشن کمشنر سکندر سلطان راجہ ممبر الیکشن کمیشن بابر حسن بھروانہ(پنجاب) و جسٹس (ر) اکرام اللہ خان (خیبرپختونخوا) آن اوفتا عہدہ غاتاسوغند ہلک۔ داوخت آ میڈیا تون گپ وتران کرسا چیف الیکشن کمشنر سکندر سلطان راجہ پارے کہ پوسکن آ گچین کاری تا فیصلہ حکومت ءِ کروئی ءِ، دا چرجوئی ٹی حلقہ بندی تیا ترندی اٹ کاریم برجاءِ، کمیشن نا کاریم ساف شفاف، بے کنڈوک ہلوک گچین کاری تا اڈ تننگ ءِ۔ اوپارے کہ الیکشن کمیشن تینا فیصلہ غاتے بے خوف کیک و کرسا کیک، فیصلہ غاتیان کس اس ناراض یا راضی مریک دا اونا ویل ءِ، الیکشن کمیشن آئین و کانود نا رداٹ فیصلہ کیک۔ اوپارے کہ حلقہ بندی تیا ترندی اٹ کاریم برجاءِ ، مردم شماری نا بابت الیکشن کمیشن نا موقف پیدوار ئسک، مردم شماری سرکاری وڑاٹ شینک مننگ آن مست حلقہ بندی کننگ مفک، مئی 2021 و 2017 نا مردم شماری نا نتیجہ شینک مس، پوسکن آ حلقہ بندی تیا کاریم مردم شماری نا نتیجہ غاتا شینک مننگ آن پد بناکرے، 2018 نا گچین کاری و حلقہ بندی تا بابت خصوصی آئینی ترمیم اتنگاسس۔ اوپارے کہ حکومت ڈیجیٹل مردم شماری کرفنگ خواہک، ڈیجیٹل مردم شماری نا نتیجہ دسمبر 2022 اسکان ملے تو وخت آ حلقہ بندی مننگ کیک، نتیجہ غاک ہرے نا گواچی مسر تو 2017 نا مردم شماری نا بنداو آ حلقہ بندی تیا گچین کاری مریک۔ پی ٹی آئی باسک قومی اسمبلی نا استیفہ غاتا بابت اوپارے کہ مسکوہی ڈپٹی اسپیکر کمیشن ءِ اسمبلی نا باسک آتا استیفہ غاتا کیس ءِ گدریفتنے۔
