یونس خان و مصباح الحق کیریئر نا آخریکو ٹیسٹ سیریز اٹی گچین کارکڑد نشان تننگ کن پُراومیت
جمیکا۔ 19 اپریل (اے پی پی) پاکستان و ویسٹ انڈیز نا کرکٹ ٹیم تا نیام اٹ مسہ ٹیسٹ میچ آتا سیریز نا اولیکو میچ (پگہ) جمعہ نا دے آن سبائنا پارک، کینگسٹن ، جمیکا ٹی بناءکیک۔ پاکستان نا ٹی 20 و ون ڈے سیریز اٹی شاندار کارکڑد سلیس، گرین شرٹس ٹی 20 سیریز 3-1 و ون ڈے سیریز 2-1 اٹ تینا پن آ کرے۔ یونس خان و مصباح الحق ویسٹ انڈیز نا برخلاف سیریز آن پد ٹیسٹ کرکٹ آن ریٹائر مریک و داڑکن او تینا گچین کارکڑد نشان تننگ کن پراومیت ئُ۔ ویسٹ انڈین کرکٹ بورڈ (ڈبلیو آئی سی بی) نا سلیکشن کمیٹی پاکستان نا برخلاف اولیکو کرکٹ ٹیسٹ میچ اکن 13 باسکی سکواڈ نا پڑو ئِ کرے۔ ہرانا ردٹ کیپٹن جیسن ہولڈر ، دیوندر ابیشو، جرمین بلیک ووڈ، کریگ بریتھویٹ، روسٹن چیس، میگل کمنز، شین ڈورچ، شینن گبرائل، شمرون ہٹمائر، شے ہوپ، الزاری جوزف، کیرن پاویل و ویشال سنگھ آ تالان ئِ۔ ہڑتوم آ ٹیم تا نیام اٹ ارٹ میکو ٹیسٹ 30 اپریل آن 4مئی اسکان بارباڈوس وخت اس کہ مسٹ میکو و آخریکو ٹیسٹ 10 آن 14مئی اسکان ڈومنیکا ٹی گوازی کننگک۔
