اسلام آباد۔ 18 جنوری (اے پی پی) الیکشن کمیشن سیاسی جماعت آتا فارن فنڈنگ کیس انا سماعت ءِ یکم فروری اسکان پد بٹے۔ چیف الیکشن کمشنر سکندر راجہ پارے کہ سکروٹنی کمیٹی نا ہچ ءُ دستاویز اس اودیم اف، کمیٹی نا رپورٹ نا گڑاس بشخ اودیم تخنگ نا خواست ءِ مسترد کننگانے۔ سے شنبے نادے آ الیکشن کمیشن اٹ فارن فنڈنگ کیس انا سماعت مس۔ پاکستان تحریک انصاف نا کنڈآن انور منصور بنچ انا مون آ پیش مس۔ اوموقف اختیار کرے کہ اودے اِرادے مست دا کیس اٹ وکیل مقرر کننگانے۔ رپورٹ نا مطالعہ ءِ کرینے، اوٹی گڑاس خامی ءُ اوڑآ کاریم کننگ نا گرج ءِ۔ رپورٹ اٹی چندی حساب وکتاب آتے وار وار آ کننگانے۔ اوبنچ آن رپورٹ اٹ گڑاس گڑاتے ہُننگ کن مہلت طلب کرے۔ اوپارے کہ ننا گڑاس غلطی ارے تو نن تسلیم کینہ، اگہ کمیٹی نا غلطی ءِ تو سہی کننگے۔ اوپارے کہ کمیٹی پیدوار نوشتہ کرینے کہ اکبر ایس بابر ہچ ءُ ثابت کننگ کتنے۔ داوخت آ سکروٹنی کمیٹی نا سروک اسپیشل سیکرٹری ہم پیش مس۔ اوموقف اختیار کرے کہ اسہ ممبر اسے نا ریٹائرمنٹ نا سوب آن کمیٹی غیر فعال مسنے۔ اوپارے کہ پی پی پی و مسلم لیگ (ن) نا کیس ہم ہنداوڑنا ءِ۔ چیف الیکشن کمیشن پارے کہ سکروٹنی کمیٹی ءِ اول سرآن ٹہیفنگے۔ کمیشن کیس انا سماعت ءِ یکم فروری اسکان پد بٹینے۔
