کوئٹہ۔ 03اگست (اے پی پی) خاتون اول بیگم ثمینہ عارف علوی پارینے کہ سینہ نا کینسر نا وخت آ تشخیص آن اونا توننگ ءِ پک کننگ مریک، ہنداخاطرآن زالبول آک بریسٹ کینسر نا مرض انا علامت آتے گوجالنگ نا جاگہ غا سنجیدہ ہلسا مرض انا تشخیص و درمان آ چکار تخر، حکومت سینہ نا کینسر آن آگاہی کن غٹ اسٹیک ہولڈر آتون سلابت آن پد گام گیج کننگ ءِ، خصوصی بندغ آتا بحالی ہم کنااست آن بھاز خڑک ءِ، و نن حکومتی ادارہ غاتون اواری اٹ اوفتے جان جوڑی و تعلیم نا آسراتی تننگ کن کوشست کننگ اُن، ای زالبول آتا راجی آسراتی و اوفتا شونداری کن آسودہی کاریم تے اٹ اولیکو دے آن وابستہ ئسٹ و داوخت آ ای زالبول آتا تعلیم و جان جوڑی نا بابت ہم چندی گام گیج ہلکوٹ۔ داغٹ انا مسخت دائس کہ زالبول آتے وتواجہ کننگے تانکہ او پاکستان اٹی راجی و زرگزرانی شونداری ٹی تینا کڑد ءِ ادا کننگ کیر۔ داخیال آتا درشانی ءِ او سے شنبے نادے آ سردار بہادر خان وویمن یونیورسٹی کوئٹہ ٹی سینہ نا کینسر نا بابت آگاہی دود آن تران کرسا کرے۔ داوخت آ باسک بلوچستان اسمبلی و پارلیمانی سیکرٹری حوالکاری بشریٰ رند، پارلیمانی سیکرٹری ترقی و نسواں و کانود ماہ جبین شیران، وائس چانسلر سردار بہادر خان وویمن یونیورسٹی کوئٹہ ڈاکٹر ساجدہ نورین ئسک ہم ساڑی ئسر۔ خاتون اول بیگم ثمینہ علوی پارے کہ زالبول آک وطن عزیز نا آبادی نا نیمہ حصہ ءُ، دُن تو پاکستان اٹی زالبول آتا کچ کم و ود 10آن 11کروڑ ءِ، دامننگ کپک کہ ننا 10کروڑ آبادی بنداوی جان جوڑی و تعلیم نا آسراتی تیان محروم مرے و اوفتے بریبر حق و اسہ وڑشونداری نا وارخواہی دوئی مف و ملک ہم شون ہلسا کے، ہنداخاطرآن اپکستان نا شونداری و اسہ بے مٹ ءُ اسلامی ریاست اس قائم کننگ کن زالبول آتے اوفتا روا حق ءِ تروئی مریک۔دودانا ایسرآ وائس چانسلر سردار بہادر خان وویمن یونیورسٹی کوئٹہ ڈاکٹر ساجدہ نورین خاتون اول بیگم ثمینہ علوی ءِ سونیئر و روایتی شال اس پیش کرے۔
