اسلام آباد۔3اگست (اے پی پی): مزن وزیر ءِ راجی جان ءُ سلامتی پڑءِ حاسیں کمک کار ڈاکٹر فیصل سلطان ءَ گشتگ کہ راجی جان ء ُ سلامتی ءِ وزارت پہ اُلس ءِ سرپدی ءِ ھاترءَ یکم اگست ءَ تاں 7 اگست زھگ ءِ ھاترءَ مات ءِ شیر ءِ پائدگ ءِ ہفتگ گوازینگ ءَ اِنت۔ سے شمبےءِ روچءَ وتی ویڈیو کلوہ ءَ آئی ءَ گشتگ کہ زھگ ءِ ردوم ءِ ھاترءَ مات ءِ شیر باز جوان ءُ بہتر اِنت۔ آئی ءَ گشتگ کہ سرجمیں دنیاءَ یکم اگست ءَ تاں 7 اگست ءَ بریسٹ فیڈنگ ءِ ہفتگ گوازینگ بوہگ ءَ اِنت۔ آئی ءَ گشتگ کہ قرآن مجید ءِ تہا گشگ بوتگ کہ مات تاں دو سالاں وتی زھگ ءَ را وتی شیر ءَ بوارین اَنت۔ ڈاکٹر فیصل سلطان ءَ گشتگ کہ اولی شش ماہ ءَ زھگ ءَ را تنا شیر ءَ ابید دگہ ایچ دیئگ مابیت ایشی ءَ چہ زھگ چہ نادراہی ءَ رکھ اَنت۔ آئی ءَ گشتگ کہ جان ء ُ سلامتی وزارت ءَ صوبائی وزارت ءُ ڈویلپمنٹ پارٹنر آں گوں ہوار بریسٹ فیڈنگ ءِ ہوالگءَ رھبند جوڑ کتگ اَنت۔ آئی ءَ گشتگ کہ بے دگہ حاسیں وجہ ءَ زھگ ءَ را ڈنی ءِ شیر ءَ نبشتہ کنگ ء ُ دیئگ جرم اِت۔ آئی ءَ گشتگ کہ مات وتی زھگاناں تاں دوسالاں وتی شیر ء َ بواریناں ۔
