اسلام آباد۔ 03اگست (اے پی پی) بنجائی وزیر ڈٹ بندی، شونداری، اصلاحات و خصوصی گام گیج و سروک نیشنل کمانڈاینڈ آپریشن سینٹر (این سی او سی) اسدعمر پارینے کہ اسہ دے اٹی 10لکھ بندغ نا کورونا دین آں بچفنگ نا ویکسی نیشن نا ہدف ءِ سرتسن۔ سے شنبے نادے آ تینا ٹویٹ اٹی اوپارے کہ تدوک آ دے 10لکھ 72ہزار بندغ آتا ویکسی نیشن ءِ کننگا۔ بنجائی ادارہ غاتا کمک اٹ ریکارڈ ویکسی نیشن مننگ ءِ۔ اوپارے کہ پنجاب، سندھ، خیبرپختونخوا، اسلام آباد اٹی ریکارڈ ویکسی نیشن مسنے۔ مچ آ ملک اٹی تدوک آ دے 10لکھ 72ہزار 342بندغ آک ویکسین ڈوز خلفیر اوکان پد ویکسین خلفوک آتا کل کچ 3کروڑ 19لکھ 29ہزار 581مسنے۔ اوپارے کہ پاکستان اٹی کورونا ویکسین نا مہم نا بنا 6تُو مست فروری آن مسوسس، اولیکو ریسہ ٹی ہیلتھ کیئر نا بشخ اتون گنڈوک بندغ آتے ویکسین خلنگا اوکان مرحلہ وار ویکسین خلنگ نا عمل بناکرے۔ بنجائی وزیر پارے کہ ملک اٹ کورونا دین انا سوب آن پین 67بندغ زوال کریر۔ اوپارے کہ اسلام آباد نا 50درسد آبادی ءِ ویکسین نا اسہ خور خلنگانے، پشاور و راولپنڈی نا 35درسد، فیصل آباد28، گوجرانوالہ، سیالکوٹ و سرگودھانا27درسد آبادی نا ویکسی نیشن مسنے وخت اس کہ کراچی نا 26و حیدر نا 25درسد آبادی نا ویکسی نیشن مسنے۔ بنجائی وزیر اسہ وار ولدا الس آن خواست کرینے کہ او کورونا ایس او پی تیا عمل کیر و زوت آن زوت ویکسی نیشن کرفر۔
