اسلام آباد۔ 25جون (اے پی پی) چین پاکستان اقتصادی راہداری نا رداٹ 660کے وی مٹیاری لاہور ہائی پاور ٹرانسمیشن نا ٹیسٹنگ نا ریسہ بناکرینے ہرانا کمک اٹ 4ہزار 400میگاواٹ بجلی نا فراوانی ءِ کننگک، ٹرانسمیشن لائن نا کمرشل آپریشن یکم ستمبر آن بناکیک۔ داچرجوئی ٹی جمعہ نادے آ ہائی پاور ٹرانسمیشن نا ٹیسٹنگ نا بناآ داڑے اسلام آباد اٹی اسہ خاص ءُ دود اس اڈتننگا ہراٹی تعلقدار چینی کمپنی تا کمامدارآک ورچوئل بشخ ہلکر۔ دود اٹی بنجائی وزیر توانائی حماد اظہر، سی پیک اتھارٹی نا چیئرمین لیفٹیننٹ جنرل عاصم سلیم باجوہ، پاکستان اٹ چین نا سفیر نونگ رانگ، سیکرٹری پاور ڈویژن علی رضابھٹہ، منیجنگ ڈائریکٹر نیشنل ٹرانسمیشن اینڈ ڈسپیچ کمپنی محمد ایوب،پرائیویٹ پاور اینڈ سٹرکچر بورڈ انا ایم ڈی شاہ جہاں مرزا، مٹیاری لاہور ٹرانسمیشن کمپنی و ایلو تعلقدار ادارہ غاتا کمامدار آک و نمائندہ غاک بشخ ہلکر۔ مٹیاری لاہور ٹرانسمیشن لائن نا لوپاور ٹیسٹنگ 800میگاواٹ آن بناکننگا و 2200میگاواٹ اسکان اونا ٹیسٹنگ سرسہبی اٹ پورو مس، اوکان پد ہائی پاور ٹرانسمیشن نا ریسہ باضابطہ وڑاٹ بناکرینے۔ داڈٹ چین پاکستان اقتصادی راہداری نا رداٹ ملک اٹ ہائی پاور ٹرانسمیشن نا اولیکو ڈٹ ءِ۔ ہراٹی چینی کارندہ غاتون اوار اوار پاکستانی تا بھلو کچ اس ہم بشخ ہلکونو و کورونا دین آن پد ہم داڈٹ آ کاریم نا رفتار اٹی ہچ ءُ کمتی اس بتنے۔ دا ڈٹ پاکستان و چین نا ایلمی تعلقداری و خڑکی سنگتی نا ڈیک ءِ۔ اینخو نا سال یکم ستمبر آن دانا کمرشل آپریشن بناکیک۔ مٹیاری لاہور ٹرانسمیشن ڈٹ جوڑ کبو، چلیفبو و گدریفبونا بنداو آ پورو کننگ انگ ءِ و دا 25سال آن پد باقاعدہ وڑاٹ پاکستان آ منتقل مریک۔
