اسلام آباد۔ 25جون (اے پی پی) وزیرخزانہ شوکت فیاض ترین پارینے کہ آئی ایم ایف 700ارب نا پوسکن ءُ خراج و یک و نیم سد ارب روپئی نا انکم خراج خلنگ نا پارے ای اونا مخالفت ءِ کریٹ، سینیٹ نا سلاہ و سوج آتے بجٹ نا بشخ جوڑ کننگک، 15ملین مخلوق ءِ خراج نیٹ اٹ اتنگک، کنوئی آ گڑاتیا سیلز خراج ءِ چٹفینن۔ جمعہ نادے آ بڑزکو ایوان نا دیوان اٹ بروک آ مالی سال 2021-22ء نا بجٹ آ شرہ ءِ چٹفسا وزیرخزانہ شوکت ترین پارے کہ ایف بی آر اسہ ہم خراج تفروک اُسے دزگیر کپک بلکن اول تھرڈ پارٹی نا کمک اٹ آڈٹ مریک، ولدا ضابطہ نا کارروائی آن پد دزگیری نا فیصلہ مریک۔ اوپارے کہ سینیٹ نا سلاہ وسوج آتے بجٹ نا بشخ جوڑ کننگک۔ وزیرخزانہ پارے کہ آئی ایم ایف 700ارب نا پوسکن ءُ خراج و یک ونیم سد ارب روپئی نا انکم خراج خلنگ نا پارے، ای اونا مخالفت ءِ کریٹ۔ اوپارے کہ نن خراج نیٹ انا دنگ ءِ ودفنہ ہرافک خراج تفسہ اوفتے خراج نیٹ انا دنگ اٹ اتینہ۔ اوپارے کہ ہندن ءُ بندغ ارے ہرا خراج تننگ نا لائخ مریرہ ولے او خراج تفسہ، داوڑنا 15ملین مخلوق ءِ خراج نیٹ اٹ اتنگک، کنوئی آ گڑاتیا سیلز خراج ءِ چٹفینن، اگہ پیدواری لائخی ودنگ ءِ تو ہرنہ کہ مشینری آ خراج آتیا انت اکن خلنگ ءِ۔
