اسلام آباد۔ 25جون (اے پی پی) بنجائی وزیر توانائی حماد اظہر پارینے کہ ساڑی حکومت بجلی نا فراوانی نا نظام ءِ گچین کننگ کن گچین گام گیج کرینے، مٹیاری لاہور ہائی پاور ٹرانسمیشن لائن نا کمک اٹ ننا بجلی نا نظام سوگو مریک و بجلی نا فراوانی نا کچ ودک،بجلی نا ڈٹ آتا کمک اٹ الس نا بنداوی گرج آتے پورو کینہ۔ ساڑی حکومت سی پیک نا ڈٹ آتے زوت پورو کننگ کن سنبرینگوک ءِ، سی پیک پاکستان کن بھازاہمیت تخک و داڑآن ملک ءِ صنعتی پیدوارءِ ودفنگ، بجلی و مواصلات نا نظام ءِ گچین کننگ و علاقہ تون رابطہ ءِ ودفنگ اٹ کمک رسینگک۔ داخیال آتا درشانی ءِ او جمعہ نادے آ سی پیک نا رداٹ مٹیاری لاہور ایچ وی ڈی سی ٹرانسمیشن ڈٹ آن ہائی پاور ٹرانسمیشن نا بنانا بابت دود آن تران کرسا کرے۔ حماد اظہر پارے کہ پاکستان و چین نا سنگتی 7عشرہ غاتیان زیات وخت آ تالان ءِ۔ 1951اٹی اولیکو وار پاکستان نا بڑزکو کہولی سرکاری ڈل چین نا دورہ ءِ کریسس۔ اینخو سال ہڑتوم آ ملک آک ساڑی ہی ٹی سفارتی تعلقداری نا 70می سال دے ءِ اڈتسنو۔ پاکستان و چین نا سنگتی تعلیم، بجلی،سیل و سوات، واپار، دفاع و جان جوڑی و سی پیک نا ڈٹ آتون اوار چندی بشخ آتے ٹی نظربریک۔ اوپارے کہ 660کے وی ایچ وی ڈی سی ٹرانسمیشن لائن ننا ترسیلی پنجراٹ اسہ پوسکن ءُ ٹیکنالوجی اسے و دانا کمک اٹ سندھ اٹی واقع بجلی گھر تیان ملک انا ایلو علاقہ غاتے بجلی فراوان کننگک۔ اوپارے کہ دا ڈٹ بجلی نا نظام ءِ سوگو کننگ و پاکستان اٹ بجلی نا تنکی نا مون ءِ توننگ کن بجلی نا فراوانی نا لائخی ءِ گچین کننگ اٹ کمک ایتک۔ کورونا دین آن پد ہم دا ڈٹ سرسہبی اٹ پورو کننگانے و داڑآن بجلی نا صارف آتے ریلیف ملک۔ اوپارے کہ سی پیک پاکستان کن بھاز اہمیت تخک۔ و داڑآن ملک ءِ صنعتی پیدوار ءِ ودفنگ، بجلی و مواصلات نا نظام ءِ گچین کننگ و علاقہ تون رابطہ ءِ ودفنگ اٹ کمک رسینگک۔ اوپارے کہ سی پیک آن پاکستان و دنیا ٹی روزگار و زرکاری نا وارخواہی ودی مسنے۔ ساڑی حکومت سی پیک نا ڈٹ آتے زوت پورو کننگ کن سنبرینگوک ءِ۔ اوپارے کہ حکومت بجلی نا فراوانی نا نظام ءِ گچین کننگ کن گچین گام گیج کرینے،۔ ہندا تُو 24ہزار 633میگاواٹ بجلی نا فراون کننگانے۔ اوپارے کہ داڈٹ انا سرسہبی آ این ٹی ڈی سی نا انتظامیہ، پی پی آئی ڈی، پاکستان مٹیاری لاہور ٹرانسمیشن کمپنی و چین نا اسٹیٹ گریڈ کارپوریشن نا خواری سفت نا قابل ءُ۔ حماد اظہر پارے کہ مٹیاری لاہور ایچ وی ڈی سی پروجیکٹ آن ہائی پاور ٹرانسمیشن نا عمل سرسہبی اٹ بناکرینے۔
