اسلام آباد۔25جون (اے پی پی): مزن وزیر عمران خان ءَگوشت کہ پاکستان امریکہ ءِ گوما نیک راھی یکوئی آناں برجا دارگ ءِ واھشت ایگ انت، نائن الیون ءَ چہ پد اے یکوئی یک نیمگی بوتگ انت، امریکہ ءَ لوٹیتگ بوتگ کہ پاکستان کمک ءِ مٹ ءَ اے گپ ءَ را بہ من ایت، کہ اوگانستان ءَ چہ امریکی ارد ءَ را در کنگ ءِ رمس ءِ جار جنگ ءَ پد طالبان ءِ سر ءَ مئے زور ءُ اثر کم بوتگ، طالبان ءَ اگاں اردئی باج برئی ءِ کشک ءَ را وتی کت گڈا دراج بُریں جنگ ءِ بندات بوت کنت، ایشی ءَ چہ ما ھم آماچ بوت کن اَنت، کشمیر ءِ جیڈھ ءِ گیواری ءَ تاں بھارت ءَ گوں یکوئی برجا بوت نہ کنت۔ اے ھیالانی درشانی آئی ءَ نامداریں امریکی تاکبند، “نیویارک ٹائمز” ءَ را داتگیں یک گلگدارے ءِ اندر ءَ کت۔ پاک امریکہ یکوئی آنی ھوالگ ءَ جستے ءِ پسو ءَ مزن وزیر ءَ گوشت کہ پاکستان ءِ وتی ھمساھگیں ملک بھارت ءِ مقابلہ ءَ امریکہ ءَ چہ گیش نزیکیں یکوئی بوتگ، نائن الیون ءَ چہ پد پاکستان ءَ ناشرکاری ءِ ھلاپ ءَ جنگ ءَ امریکہ ءِ گوما یکجائی کتگ، نوں وھدیکہ امریکہ اوگانستان ءَ چہ واپس روگ ءَ انت پاکستان یک مھکمیں یکوئی ءِ واھشت ایگ اِنت۔ انچو کہ راج آنی نیام ءَ بیت، ما امریکہ ءِ گوما وتی تجارتی یکوئی آناں گہتر کنگ لوٹاں۔ پاک ۔ امریکہ یکوئی آنی بابت ءَ گیش سہرا کنان ءَ مزن وزیر ءَ گوشت کہ پاکستان اے رنگیں یکوئی آنی واھشت ایگ انت انچو کہ امریکہ ءُ برطانیہ ءُ بھارت ءِ نیام ءَ اے وھد ءَ برجا انت، ما انچیں یکوئی ءِ لوٹاں، انچو کہ امریکہ ءُ برطانیہ یا امریکہ ءُ بھارت ءِ نیام ءَ اے وھد ءَ برجا انت، ما اے وڑیں یکوئی ءِ لوٹاں ھما کہ یکوئی ءِ رد ءَ بہ بنت۔ آئی ءَ گوشت کہ بد بھتی ءَ ناشرکاری ءِ ھلاپ ءَ جنگ ءِ ساھت ءَ اے یکوئی برابر ے نہ بوتگ انت۔ امریکہ ءَ اے پھمتگ کہ آ پاکستان ءَ را کمک دیگ ءَ انت ھمے ھاترا پاکستان ءَ را امریکہ ءِ گپ منگی انت ءُ پاکستان ءَ امریکہ ءِ واستہ ھرچی کتگ ایشرا بنی آدمی جان ءُ نپس آنی قیمت ءِ رد ءَ دیگ کپتگ، پاکستان ءَ اے جنگ ءَ 70 ہزار جا ن آنی قربانی داتگ ءُ ملکی معیشت ءَ را ایشی ءَ چہ 150 ارب ڈالر ءِ تاوان رستگ، ناشرکاری ءِ ھلاپ ءَ جنگ ءِ سبب ءَ وت کشیں ارش ءُ ملک ءَ جاہ جاہ ءَ بمب تراک بوتگ۔ مزن وزیر ءَ گوشت کہ ادا چہ جیڈھ آنی بندات بوتگ، امریکہ ءَ پاکستان ءَ چہ گیش امیت بندوک کتگ ءُ بد بھتی ءَ پاکستانی حکومتی ھمے کنگ ءِ کوشست کتگ ھمیشی ءِ ازم ءُ کنشت آوانی کرا نہ بوتگ۔ دوئیں ملک آنی نیام ءَ یکوئی ءِ کمیگ بوتگ ءُ پاکستانی الس آں اے پھمتگ کہ آواں امریکہ ءِ گوما یکوئی ءِ ٹوھیں قیمت داتگ ءُ امریکہ ءَ اے پھمتگ بوتگ کہ پاکستان ءَ سک باز اچ نہ کتگ پمے ھاترا اے رنگ ءَ اے یک نیمگی یکوئی ءِ بوتگ۔ مزن وزیر ءَ گوشت کہ ما آیوکیں باندات ءَ اے وڑیں یکوئی لوٹاں ھمائی بندات دل یکیمی ءُ یکجائی سیت آنی رد ءَ بہ بنت ءُ اے وھد ءَ انچوش انت بزاں اوگانستان ءَ مئے مول ءُ مراد مرچی ھمگونگین اَنت۔ مزن ویر ءَ را جست گرگ بوت کہ پاکستان ءَ اوگانستا ن ءَ چہ امریکہ ارد ءِ در کنگ ءَ پد ایشی ءِ گوما روگ ءُ آیگ ءَ برجا دار ایت؟ ایشی ءِ پسو ءَ مزن وزیر ءَ گوشت کہ من ایشی ءِ پسو ءَ اچ گوشت نہ کناں، من اے بابت ءَ اے رنگ ءَ سسا نہ کتگ کہ پاکستان ءُ امریکہ ءِ گوما مول ءُ مرادی یکوئی بہ بیت۔ ریاست آنی نیام ءَ یکوئی سیت آنی بنیات ءَ بنت، پاکستان گیشتریں ورنا آنی آباتی ءِ رد ءَ 22 کروڑ مردم آنی ملک انت ایش آیکویں باندات ءِ واستہ یک ردے ءَ مول ءُ مراد ءِ رد ءَ انت، اگاں مئے بھارت ءِ گوما یکوئی کجام بھر ءَ گہتر بنت ھمائی ءِ واستہ کہ من امیت ایگ آں چوکہ پاکستان ءَ یک نیمگ ءِ ٹوھیں مارکیٹس آنی تہ ءَ یک مارکیٹ ءِ ساڑی انت ءُ دومی نیمگ ءَ چین انت، ھمے رنگ ءَ مئے نیمگ ءَ دو ٹوھیں منڈی است انت ءُ پدا ھاٹیگ ءِ راہداری ھم است انت ایشاں چہ سیت چست کنگ بوت کنت۔ ھمے رنگ ءَ پاکستان اقتصادی رد ءَ آیکویں باندات ءَ جوانیں ھند ءُ بستار ءِ دار ایت۔ مزن وزیر ءَ پاکستان ءُ امریکہ ءِ نیام ءَ اردی ءُ سلامتی یکوئی آنی ھوالگ ءَ جست ءِ پسو ءَ گوشت کہ اوگانستان ءَ چہ امریکہ ارد ءِ در کنگ ءَ چہ پد من نہ زاناں کہ پاکستان ءُ امریکہ ءِ نیام ءَ اردی یکوئی چتور ءُ چہ وڑیں بنت بلے اے وھد ءَ اے یکوئی اوگانستان ءَ چہ امریکہ ارد ءِ در کنگ ءَ چہ پیسر جیڈھ ءِ سیاسی گیواری ءَ چہ یکوئی مول ءُ مراد آنی رد ءَ بہ بنت چیا کہ پاکستان اوگانستان ءَ ھون ءُ ھون ریچی نہ لوٹ ایت من دل یکیم آں کہ امریکہ ھم اوگانستان ءَ یک یا دو کھرب ڈالر ھرچ کنگ ءَ پد نہ لوٹ ایت کہ اے ملک آچ ءُ انگر آنی تہ ءَ بہ سُچ ایت ھمے ھاترا مئے مول ءُ مراد ھمگونگین انت۔ مزن وزیر ءَ گوشت کہ پاکستان ءَ طالبان ءِ سر ءَ وتی گیشاں چہ گیش زور ءُ اثر کارمرز کتگ۔ آئی ءَ گوشت کہ پاکستان اے سئیں ملک آنی تہ ءَ یک ات کہ آئی ءَ 1996 ءَ چہ پد طالبان ءَ را من اتگ۔ مزن وزیر ءَ گوشت کہ اوگانستان ءَ چہ امریکی ارد آنی در کنگ ءِ رمس ءِ جار جنگ ءَ چہ پد طالبان ءِ سر ءَ مئے زور ءُ اثر کم بوتگ ءُ ایشی ءِ یک سبب ءِ ھمیش انت کہ انچو کہ امریکی ارد در کپگ ءِ رمس ءِ جار جنگ بوتگ طالباسن ءَ باج برئی ءِ جار جتگ، آ سسا کنگ ءَ انت کہ آواں جنگ باج برتگ پمے ھاترا نوں آ وتارا مھکم پھم انت ءُ آوانی سر ءَ مئے زور ءُ اثر کم بوتگ۔ بھارت ءِ بابت ءَ یک جستے ءِ پسو ءَ مزن وزیر عمران خان ءَ گوشت کہ توامیں پاکستانی آنی مٹ ءَ بھارت ءَ را گیش زاناں، کرکٹ یک ٹوھیں لیب ءُ گوازی ات ایشی ءِ سبب ءَ من بھارت ءَ گوں دوستی ءُ شرپ ءُ ازت شوہازتگ، وھد ءِ من مزن وزیری ءِ سیٹ ءَ نشتگ آں گڈا درستاں چہ گیش مزن وزیر مودی ءَ را گوشت کہ سروکی ءَ منی آیگ ءِ ٹوھیں مول ءُ مراد پاکستان ءَ چہ گریبی ءِ ھلاسی انت ءُ ایشی ءِ واستہ گہتریں کشک ایش بیت کہ بھارت ءُ پاکستان ھمروچگیں نمونگ ءِ تجارتی یکوئی برجا بدار انت ایشی ءَ چہ دوئیں ملک آناں سیت رس ایت، ما ایشی ءِ واستی کوشست کتگ بلے ایشی ءِ اچ رند پد سہر انہ بوتگ۔ من پھماں کہ ہندو راج دوست آر ایس ایس ءِ لیکہ ھمیش انت ھمیشی ءَ گوں نریندر مودی سیادی دار ایت ایشی آئی کشک ءَ یک ڈیوال ءِ جوڑ بوھان ءَ اوشتاتگ۔ آئی ءَ گوشت کہ بھارت ءَ دگہ کجام ھم سروکی ءِ بہ بوت انت، آئی ءِ گوما جوانیں یکوئی ءِ برجا بوتگ انت ءُ ما توامیں شرپ ءُ ازت ءِ رھبند آنی گیواری کتگ ات۔ کشمیر ءِ جیڈھ ءِ بابت ءَ یک جستے ءِ پسو ءَ مزن وزیر عمران خان ءَ گوشت کہ من پھماں کہ اے بھارت ءِ واستہ تباہیگ ءِ بیت چیا کہ ایشی ءِ مول ءُ مراد ایش بیت کہ اے جیڈھ برجا بہ مان ایت ءُ ھرچند کہ اے جیڈھ گیوار مہ بیت، ایش پاکستان ءُ بھارت ءِ نیام ءَ ھمروچگیں یکوئی آنی رد ءَ پینگ جنت۔ بھارت امریکہ یکوئی ءُ پڑ ءَ چین ءِ گیش لھڈ بوھوکیں آسر آنی بابت ءَ جستے ءِ پسو ءَ مزن وزیر ءَ گوشت کہ اے گوشگ لوٹاں کہ اے یک اجبیں گپ ات کہ امریکا ءُ چین یک ءِ دومی ءِ کُنت چیا جوڑ بنت، اگاں اے دوئیں ٹوھیں ھاٹیگ، دوئیں مزنیں اقتصادی ھاٹیگ یک ءِ دومی ءِ گوما تجارت کناں گڈا ایشی ءَ چہ دگنیا ءَ را سیت رس ایت ءُ ایشی ءِ نپ ءُ سیت مارا درستاناں رس ایت۔ آئی ءَ گوشت کہ امارا چین ءُ امریکا دوئین آنی گوما یکوئی دارگ لوٹ ایت۔ مزن وزیر ءَ گوشت کہ پاکستان ءُ چین ءِ گوما باز کوھنیں یکوئی است انت، چین پاکستان ءِ یک جوانیں دوست ات ، چین ءَ ناشرکاری ءِ ھلاپ ءَ جنگ ءَ چہ پد ء ناشرکاری ءِ ھلاپ ءَ جنگ ءِ ساھت ءَ پاکستان ءِ ھمبراہ داری کتگ، وھد ءِ مئے وام گیش بنت ءُ ایش ھما وھد ءَ بنت وھد ءِ یک ملک ءِ جنگ ءِ ھالت ءَ بہ بیت، تجارتی چست ءُ ایر فریز بہ بنت، صوبگ ءُ قبائلی دمگ جنگءَ چہ تباہ بہ بنت ءُ اے سکیں ساھت ءَ چین پاکستان ءِ کمک ءَ اتکگ۔ آئی ءَ گوشت کہ امریکہ چیا اے پھمگ ءَ انت کہ بھارت چین ءِ ھلاپ ءَ آئی دیمپانی ءِ واستہ کوکا ءِ رنگ ءَ کرد پیلو کنت، اگاں بھارت وتی واستہ اے رنگیں کرد ءِ کنگ لوٹ ایت گڈا آئی ءِ واستہ تاوان بار سہرا بیت چیا کہ بھارت ءِ چین ءِ گوما تجارت دوئیں بھارت ءُ چین ءِ واستہ سیت مند انت۔
