اوغانستان اٹی ودوک آ شدت پسندی، گڑتی نا سوب ءِ، وزیرخارجہ مخدوم شاہ محمود قریشی

اسلام آباد۔ 24جون (اے پی پی) وزیرخارجہ مخدوم شاہ محمود قریشی پارینے کہ اوغانستان اٹی ودوک آ شدت پسندی گڑتی نا سوب ءِ، پرتشدد واقعہ غاتے ٹی ودکی امن مخالف واکدارتے سوگوی تننگ نا سوب مننگ کیک۔ داہیت ءِ او ایرانی وزیر خارجہ نا نمائندہ خصوصی اوغانستان محمد ابراہیم طاہریان فرد اتون گپ وتران کرسا پارے ہرا پنچ شنبے نادے آ ڈل اتون اوار وزارت خارجہ ٹی اوڑتون اوڑدہی کرے۔ اوڑدہی ٹی ہڑتوم آ کنڈآتا تعلقداری، اوغان امن عمل، ڈیہہ ٹی امن و ایمنی تون اوار تین پہ تینی است خواہی نا باندات آ گپ وتران کننگا۔ وزیرخارجہ ایران اٹ صدارتی گچین کاری تا سرسہب اڈتننگ آ ایرانی سرکڑدہ و ایرانی الس ءِ مبارکبادی تس و پاکستانی سرکڑدہ غاتا کنڈآن ایران نا پوسکن گچین مروک آ صدر سید ابراہیم رئیسی کن نیک است خواہی نا درشانی ءِ کرے۔ وزیرخارجہ پارے کہ تدوک آ منہ سال اٹی پاکستان و ایران نا نیام اٹ برادرانہ تعلقداری پین سوگو مسنے۔ ہڑتوم آ کنڈآتا تعلقداری نا سوگوی ٹی ایران نا وزیرخارجہ جواد ظریف نا کڑد سفت نا قابل ءِ۔ پاکستان، ڈیہہ ٹی امن کن اوغانستان نا امن ءِ المی تکک۔ شاہ محمود قریشی پارے کہ پاکستان اولیکو دے آن داموقف نا مخ تف مسنے کہ اوغان ویل انا ہچ ءُ فوجی ایسر اس اف۔ گرج داہیت انا ءِ کہ اوغان سرکڑدہ ئی ٹی، اوغان تیکن قابل قبول، جامع مذاکرات نا کمک اٹ اوغان ویل انا دیرپاسیاسی ایسر اس کشنگے۔ اوپارے کہ اوغانستان اٹی بدامنی نا سوب پاکستان و ایران ہڑتوم آک زہمی مسنو۔ وزیرخارجہ اوغانستان امن کن ایران نا کوشست آتا ستاءِ کرے۔ وزیرخارجہ پارے کہ جہانی برادری نا مخ تفی ءِ غنیمت ہرسا، اوغان کڑدہ غاتے اواری اٹ تولسا، مذاکرات نا کمک اٹ اوغان امن عمل ءِ بھرمی جوڑ کننگ کن دمدستی گام گیج کروئی مریک۔ اوغانستان اٹی امن آن ڈیہہ ٹی رابطہ غاتا مون آ دننگ، واپاری سرجزآتے ٹی ودکی، اوغان باہوٹ آتا وطن آ پدی ہِننگ و علاقائی سوگوی ٹی کمک رسینگک۔ ایرانی وزیرخارجہ نا نمائندہ خصوصی اوغانستان ابراہیم طاہریان فرد وزیرخارجہ نا منت واری ءِ ہرفسا اوغانستان اٹی امن کن اسیجائی کوشست آتے کاریم اٹ اتنگ نا عندیہ تس۔