اسلام آباد۔ 24جون (اے پی پی) وزیراعظم عمران خان تون قومی اسمبلی نا باسک آک اوڑدہی کریر۔ پنچ شنبے نادے آ وزیراعظم آفس نا میڈیا ونگ آن جاری بیان نا رداٹ اوڑدہی ٹی سلاہکار واپار و زرکاری عبدالرزاق داؤد، خصوصی کمکار سیاسی امور ملک عامر ڈوگر، قومی اسمبلی نا باسک عاصم نذیر، رضانصراللہ گھمن، خرم شہزاد و صنعت کار شاہد نذیر ئسک ساڑی ئسر۔ اوڑدہی ٹی ملکی سیاسی حالیت، بجٹ اٹ الس نا ریلیف و صنعت آتا آسراتی و شونداری کن اوار گام گیج آتیا گپ وتران مس۔ عاصم نذیر وزیراعظم ءِ ٹیکسٹائل نا بشخ اتون تعلقدار باندات، خاص وڑاٹ ساڑی حکومت نا گام گیج آتے ٹی ٹیکسٹائل نا بشخ آتا مون آ دننگ و شونداری، برآمدآتے ٹی بشخ انا کڑد انا بابت سرجم حوال تس۔ بشخ انا پین گچینی و مون آ دننگ نا بابت ایسرنا چاری باندات و سلاہ تے ہم وزیراعظم ءِ پیش کرے۔
