اسلام آباد۔ 24جون (اے پی پی) وزیراعظم عمران خان و بل اینڈ ملنڈاگیٹ فاؤنڈیشن نا شریک چیئرمین بل گیٹس ملک اٹی پولیو نا چٹفنگ کن برجا مہم و کوویڈ۔ 19آن ودی مروک آ جان جوڑی نا چیلنج آتون مون تننگ کن پاکستان نا گام گیج آتیا گپ وتران کرینو۔ پنچ شنبے نادے آ وزیراعظم آفس نا میڈیا ونگ آن جاری بیان نا رداٹ وزیراعظم عمران خان مچ آ دنیاٹی پسماندہ بندغ آتا زرگزرانی و راجی شونداری و خاص وڑاٹ جان جوڑی نا خذمت اسکان جہانی رسینگ ءِ مون آ دننگ و چندی مرض آتا توننگ کن بل اینڈ ملنڈاگیٹ فاؤنڈیشن نا کوشست آتا ستاءِ کرے۔ اوخاص وڑاٹ پاکستان ءِ پولیو آن پاک کننگ کن فاؤنڈیشن نا شریداری آ منت واری ءِ ہرفے۔ وزیراعظم داہیت انا درشانی ءِ کرے کہ پولیو نا چٹفنگ حکومت نا اہم قومی اولیت ءِ و کورونا دین انا چیلنج آن پد ہم مچ آ ملک اٹی پولیو تور مہم ءِ پین ترند کننگ کن پبی کوشست کننگ انگ ءِ۔ ہنداتُو 7آن 11جون اسکان ملک اٹی پولیوناچٹفنگ کن خصوصی مہم نا اوذکر ءِ کرے ہراٹی پنچ سال آن کم وئی نا 33ملین چناتے پولیو ویکسین نا پڑی کنفنگا۔ وزیراعظم ملک اٹ پولیو دین انا تالانی ءِ توننگ اٹ پبی پیش رفت آ است جمی نا درشانی ءِ کرے و اومیت ظاہر کرے کہ غٹ شریدار آتا کمک اٹ پولیو ءِ زوت چٹفنگک۔ بل گیٹس داقومی مسخت کن وزیراعظم عمران خان نا سرکڑدہ ئی کڑد انا ستاءِ کرے۔ اوپارے کہ پولیو نا مون ءِ توننگ نا چرجوئی ٹی پیش رفت ستاکڑزک و داچرجوئی ٹی پبی کوشست آک پولیو نا تالانی ءِ توننگ اٹ کمکارمریرہ۔ وزیراعظم ملک اٹ کورونا دین انا مسٹ میکو ریسہ نا مون ءِ توننگ کن پاکستان نا کوشست آتے ہم تالان کرے۔ انفارمیشن ٹیکنالوجی(آئی ٹی) نا بشخ اٹی پاکستان نا لائخی و حکومت نا کاروبار دوست پالیسی نا ذکر ءِ کرسا وزیراعظم مائیکرو سافٹ ءِ پاکستان اٹ تینا سرجزآتے پین ودفنگ کن پارے۔ وزیراعظم عمران خان و بل گیٹس انا نیام اٹ ٹیل فون رابطہ ہنداتُو انا اول آتے ٹی پولیو نا چٹفنگ جہانی گام گیج آتا بابت پولیو و سائٹ بورڈ انا ڈل انا پاکستان نا دورہ غان پد انا حالیت آتا چرجوئی ءِ و بورڈ انا ڈل دورہ ٹی وزیراعظم عمران خان تون اوڑدہی کرے و وزیراعظم پولیو نا چٹفنگ نا بابت قومی ٹاسک فورس انا دیوان اس ہم اڈتسوسس۔ پولیو نا چٹفنگ کن جہانی گام انا پوسکن آ حکمت عملی نا بناءِ اینخونا سال 10جون آ اسہ جہانی ورچوئل کانفرنس اسے ٹی کننگاہراٹی پاکستان نا کنڈآن ہم بڑزکو کہول آ بشخ ہلنگا۔
